Kigali: Hatangijwe icyiciro cy’imyaka itatu cya gahunda “Mvura-Nkuvure”

Yanditswe na Dean Irak
Kuya 18 Nyakanga 2013 saa 05:20
Yasuwe :
0 0

Gahunda yo gukemura amakimbirane mu muryango nyarwanda hifashishijwe ibiganiro yitwa Mvura-Nkuvure (community-Based Sociotherapy program CBSP) yatangijwe mu turere umunani ari two Muhanga, Nyamagabe, Gicumbi, Rulindo, Karongi, Rubavu, Bugesera na Gatsibo.
Ubu buryo bwo kugirana ibiganiro bihoraho mu matsinda atsura umuryango mwiza, bwatangijwe bwa mbere mu Rwanda mu 2005 buzanywe n’abashakashatsi bo muri Kaminuza ya Amsterdam yo mu gihugu cy’Ubuhorandi.
Bwatangirijwe muri Diyosezi (...)

Gahunda yo gukemura amakimbirane mu muryango nyarwanda hifashishijwe ibiganiro yitwa Mvura-Nkuvure (community-Based Sociotherapy program CBSP) yatangijwe mu turere umunani ari two Muhanga, Nyamagabe, Gicumbi, Rulindo, Karongi, Rubavu, Bugesera na Gatsibo.

Ubu buryo bwo kugirana ibiganiro bihoraho mu matsinda atsura umuryango mwiza, bwatangijwe bwa mbere mu Rwanda mu 2005 buzanywe n’abashakashatsi bo muri Kaminuza ya Amsterdam yo mu gihugu cy’Ubuhorandi.

Bwatangirijwe muri Diyosezi Angilikani ya Byumba, bukoreshwa mu gukemura ibibazo hagamijwe Ubumwe n’Ubwiyunge ndetse n’isanamitima mu baturage. Nyuma bwaje kandi gukoreshwa no mu karere ka Bugesera nanone mu bijyanye n’ubumwe n’ubwiyunge.

Nyuma y’umuhango wabereye i Kigali wo gutangiza iyi gahunda ku mugaragaro, Umunyamabanga nshingwabikorwa wa Komisiyo y’Ubumwe n’Ubwiyunge (NURC), Dr Habyarimana Jean Baptiste, yabwiye IGIHE ko gahunda ya “Mvura-Nkuvure” izafasha mu kuvura ibikomere bya Jenoside bikigaragara mu mitima y’Abanyarwanda.

Yagize ati “Bizadufasha gukomeza urugendo twatangiye muri Gacaca mu kunga Abanyarwanda. Hakenewe ko abantu bahura bakaganira biciye mu muco kugira ngo bakomeze gahunda y’ubwiyunge.”

Emmanuel Ngendahayo, umushumba mu Itorero ry’Abangilikani mu Rwanda (EAR) ari nawe wabaye umuyobozi w’iyi gahunda kuva itangizwa kugeza ubu, yavuze ko kuba yongeye gutangizwa mu cyiciro cyayo cya kabiri cy’imyaka itatu mu turere umunani ari mu rwego rwo kuyagura kuko yagaragaje umusaruro mu kubanisha Abanyarwanda.

Yagize ati “Ni gahunda ije kwagura iyari isanzwe kuko yagize umusaruro mu gufasha abantu gukira ibikomere biyunga, babana neza, bitabira ibikomerwa rusange biganisha ku itarambere.”

Leoni Margarita Cuelenaere, Ambasaderi w’u Buholandi mu Rwanda yavuze ko igihugu ahagarariye kitazahwema gutera inkunga iyi gahunda kuko ishyigikira ubumwe n’ubwiyunge mu banyarwanda. Yagize ati “Twiyemeje gutera inkunga iyi gahunda kuko ishyigikira ubwiyunge mu Rwanda. Icyo twiteze ni uko ubwo bwiyunge bwatangiye mu Rwanda bwagera ku yindi ntera.”

Iyi gahunda yatangijwe kuri uyu wa 16 Nyakanga 2013 izarangira mu 2016. Izashyirwa mu bikorwa ku bufatanye n’imiryango itegamiye kuri Leta irimo Prison Fellowship Rwanda, EAR/Byumba Diocese na Duhumurizanye Iwacu Rwanda (DIR).

Uyu muhango wo gutangiza iyi gahunda wari witabiriwe kandi n’Imiryango IRCT, ARAMA na Uyisenga n’Imanzi nayo isanzwe ishyira mu bikorwa gahunda ya Sosiyoterapi muri tumwe mu turere tw’u Rwanda, mu gihugu cy’u Burundi no muri Repubulika Iharanira Demokarasi ya Congo.

Sosiyoterapi (Mvura-Nkuvure) ni iki?


Uhereye ku miterere y’ijambo ubwaryo usanga Sociothérapie ari ijambo ry’inyunge rigizwe n’amagambo abiri: “Socio” na “thérapie”. “Socio” biva ku ijambo “Société” risobanura umuryango mugari w’abantu, naho “Thérapie” bivuze kuvura.

Ugenekereje mu Kinyarwanda wavuga ko sosiyoterapie bwaba ari uburyo bwo kuvura ibibazo umuryango wa muntu wifitemo ukoresheje abawugize. Abatangiye gukoresha ubu buryo bukigera mu Rwanda bo, bakurikije imiterere yayo, bayise “Mvura nkuvure”.

Mu magambo make twe twavuga ko Sosiyoterapi ari uburyo bwo gufasha bushingiye kubiganiro bibera mu matsinda y’abantu bagamije guhana inama n’ubuhamya bukiza.
Sosiyoterapi ikorerwa mu matsinda agizwe n’abantu hagati ya 10-15 ayobowe n’abafashabiganiro babihuguriwe umwe akayobora undi akandika ibibera muri iryo tsinda.

Kugira ngo abagize itsinda bakure babe bacutswa bisaba nibura ibyumweru 15. Muri sosiyoterapi abatuye umusozi umwe bafatwa nk’aho i ari abavuzi bashobora kuvurana hagati yabo.

Ubu buryo bwo kuvurana aho dutuye (community), bwagiye bukoreshwa ahantu hanyuranye. Nko mu Bwongereza, cyane cyane nyuma y’intambara ya kabiri y’isi yose, bwakoreshwaga mu kwita ku basirikari bari bafite ibikomere n’ibibazo byo mu mutwe byatewe n’iyo ntambara.

Sosiyoterapi kandi ikoreshwa nka bumwe mu buryo bwo kwita ku bafite ibibazo byo mu mutwe mu gihugu cy’Ubuholandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza