Abayobozi bakuru b’ingabo za Loni zishinzwe amahoro muri Sudani y’Amajyepfo bambitse imidari ku mugaragaro ingabo z’u Rwanda zimaze amezi 8 zibungabunga amahoro muri icyo gihugu, bamwe mu bitabiriye uwo muhango ni Abanyarwanda bahatuye.

Ubuyobozi bw’ingabo zibungabunga amahoro muri Sudani, UNMISS, abapolisi babungabunga amahoro, ndetse n’Abanyarwanda bahatuye, bakurikiranye umuhango n’imyiyerekano yo kwakira imidari ku wa Gatanu ushize.

Umuyobozi wungirije wa UNMISS, Col Jeet Gurung ni we washyikirije imidari ingabo z’u Rwanda.

Gurung yashimiye Leta y’u Rwanda muri rusange, ku bufatanye n’ubushake igira, ari na ko yohereza ingabo gucunga umutekano mu bihugu bifite intambara.

Uwagiye ayoboye izo batayo, Brig Gen Andrew KAGAME yavuze ko ku nshingano bari bafite zo kubungabunga amahoro bongeyeho no kubaka ikiraro ahitwa Duma, bahaye abaturage amasuka asaga 420, bubatse amashuri kandi bageza amazi ku baturage batayagiraga, hakaba hari n’aho bubatse isoko.

Hashize igihe ingabo z’u Rwanda zitangiye kujya zoherezwa mu butumwa bw’amahoro muri Sudani.