Bivugwa ko izi mpapuro zariho amazina y’abasirikare, amapeti yabo, amakuru ajyanye n’ububiko bw’intwaro, ajyanye n’uko basimburana mu kazi n’andi makuru yo mu kigo cya gisirikare cya Catterick Garrison. Ni cyo kinini u Bwongereza bufite.

The Sun yanditse ko izo nyandiko zabonywe mu gikoresho gishyirwamo imyanda hafi y’ikiraro cya Catterick Bridge kiri i North Yorkshire.

Ni inyandiko zashoboraga guteza ibibazo iyo zibonwa n’umwe mu banzi b’u Bwongereza nk’uko Colonel Philip Ingram, wahoze mu nzego z’ubutasi z’u Bwongereza yabivuze.

Ati “Ziteje ibyago mu bijyanye n’umutekano. Ni ukumena amabanga ibigaragaza kutita ku bintu.”

Colonel Philip Ingram yashimangiye ko impauro ziriho amakuru nk’aya akomeye zari zikwiye gutwikwa cyangwa zikangizwa mu bundi buryo mbere y’uko zitabwa mu myanda.

Mu mwaka ushize na bwo inyandiko zariho amakuru y’abasirikare bakorera mu kigo cya Catterick Garrison, zabonywe zinyanyagijwe ku muhanda wa Newcastle.

Na bwo zariho amakuru y’abasirikare, uburyo basimburanwa mu kazi, intwaro zirimo n’ibindi. Izi nyandiko na zo zari zavuye mu gikapu gitwara imyanda.

Impapuro zo mu Kigo cya gisirikare cya Catterick Garrison ziriho amakuru akomeye y’igisirikare cy’u Bwongereza zasanzwe mu kimoteri