Ubundi iyo bagiye kureba ibihugu bikize kurusha ibindi bareba umusaruro wabyo ku mwaka, ibyo bita mu ndimi z’amahanga Produit Interieur Brut (PIB)/Gross Domestic Product (GDP) ingana n’umusruro wose w’igihugu mu nzego zose ukuyemo igishoro batanze.

Nk’uko bitangazwa n’Ikigega Mpuzamahanga cy’imari, mu mwaka wa 2012 ibihugu bikize byakurikiranaga muri ubu buryo

1. Leta zunze Ubumwe za Amerika ziza ku isonga n’umutungo ungana na miliyari 15,643 z’amadolari ya Amerika.

2. U Bushinwa na miliyari 8,249 z’amadolari ya Amerika

3. U Buyapani na miliyari 5,936 z’amadolari ya Amerika

4. U Budage na miliyari 3,405 z’amadolari ya Amerika

5. U Bufaransa na miliyari 2,607 z’amadolari ya Amerika

6. U Bwongereza na miliyari 2,443 z’amadolari ya Amerika

7. Brazil na miliyari 2,282 z’amadolari ya Amerika

8. U Butaliyani na miliyari 1,999 z’amadolari ya Amerika

9. U Burusiya na miliyari 1,954 z’amadolari ya Amerika

10. U Buhinde na miliyari 1,954 z’amadolari ya Amerika

Nk’uko bitangazwa n’ikigo cy’ubukungu n’ubushakashatsi mu bucuruzi (Centre for Economics and Business Research: CEBR) muri raporo yayo y’uyu mwaka « The World Economic League Table », ibihugu biri mu myanya itatu ya mbere ntibizahinduka kugeza mu 2022, ariko u Bushinwa buzatera imbere hafi kwegera Leta Zunze ubumwe za Amerika, kuko buzagira 83% by’umutungo wa Leta Zunze ubumwe z’Amerika mu gihe ubu bufite 53%.

U Burusiya na bwo buzatera imbere cyane buve ku mwanya wa 9 bugere ku wa 7 mu 2022. U Butaliyani bwo buzasubira inyuma, aho buzava ku mwanya wa 8 buriho ubu bukagera ku wa 13 mu myaka 10.

Igihugu kizatera imbere cyane ni u Buhinde buri ku mwanya wa 10 ubu buzagera ku mwanya wa 4 mu 2022. Ariko na none kuvuga ko ibihugu bikize kurusha ibindi, ntibivuga ko abaturage babyo babayeho neza kurusha abo mu bindi bihugu, kuko ugereranije imibereho y’Abashinwa n’iy’abo muri Norvege usanga ntaho bihuriye kuko abo muri Norvege babayeho neza.

Hano igipimo bakoresha ni umusaruro w’igihugu ku mwaka na wo mu mibare (PIB nominal/Nominal GDP) batitaye ku bindi bipimo by’iterambere nka (Human Development index/Indice du development humain)

Igihugu cyo muri Afurika kiri hafi ni Afurika y’Epfo iri ku mwanya wa 29 na miliyoni 422, 037 z’amadolari ya Amerika.