Iyi raporo yasohowe kuri uyu wa Kabiri tariki 29 Ukuboza 2015 igaragaza ko abanyamakuru 67 bishwe bari mu kazi kabo mu gihe abandi bishwe mu bundi buryo ariko ibimenyetso bikagaragaza ko bahowe umwuga wabo.

Mu bihugu byaguyemo abanyamukuru benshi muri 2015 harimo Iraq, ahiciwe abanyamakuru 11, Siria hiciwe abanyamakuru icumi ndetse no mu Bufaransa, ahiciwe abanyamakuru umunani mu bitero byagabwe ku gitangazamakuru cy’inkuru zishushanyije cya Charlie Hebdo.

Iyi raporo ikomeza igaragaza ko Iraq na Siria aribyo bihugu bihangayikishije ku buzima bw’abanyamakuru kuko hari abicirwayo bagabweho ibitero ubwabo ndetse n’abagwa mu ntambara baba bagiye gushakamo amakuru.

Hakorwa iki ngo ubuzima bw’abanyamakuru burengerwe?

Umunyamabanga mukuru wa Reporters sans frontiers, Christophe Deloire avuga ko muri raporo y’Umuryango w’Abibumbye yasohotse muri Kanama 2015 hagaragajwemo uburyo bwo kurengera abanyamakuru, ariko ntibyigeze bishyirwa mu bikorwa.

Mu bindi bihugu byaranzwe no kwicirwamo abanyamakuru benshi muri uyu mwaka, harimo Mexique, Philippines ndetse n’u Buhinde. Uyu muryango uvuga ko akenshi abanyamakuru bicwa hagamijwe kubacecekesha no guhisha ukuri kw’ibikorwa n’abantu babi.

Hari abanyamakuru baguye ku rugamba n'abishwe bigambiriwe