Ikinyamakuru Bild cyatangaje ko muri Kamena 2025, Merz yari ashyigikiwe n’abantu 36%, na ho 45% bamunenga. Kugeza ubu ihuriro ry’amashyaka ayoboye igihugu ririmo Ishyaka rya CDU abarizwamo, n’irya SPD, yombi arushaho kunengwa bikomeye n’abaturage.

Ubu bushakashatsi bwerekana ko hafi kuri 60% by’Abadage batishimiye imikorere y’iri huriro riri ku butegetsi, ugereranyije na 44% bariho mu ntangiriro za Kamena 2025.

Bivuze ko iyo amatora aza kuba mu mpera ziki cyumweru, CDU yari gutsindira gusa 27% by’amajwi, naho SPD igahabwa 15%, bivuze ko batashobora gukomeza kugira ubwiganze mu nteko ishinga amategeko.

Kuva Merz yafata ubutegetsi muri Gicurasi 2025, yahise afata umurongo ukarishye mu bijyanye n’ububanyi n’amahanga cyane cyane yibasira u Burusiya ku ntambara buhanganyemo na Ukraine.

Berlin iri mu bafasha Kiev bakomeye, aho yiyemeje gutanga miliyari 5 z’Amayero zo gufasha mu gukora intwaro zifite ubushobozi bwo kurasa kure.

Muri Nyakanga 2025, Merz yatangaje ko abona inzira ya dipolomasi mu gukemura intambara mu Burusiya na Ukraine zitagishobotse.

Mu gihugu imbere, uko guverinoma iteganya gukoresha umutungo wa rubanda na byo bikomeje guteza impaka n’uburakari, aho abatavuga rumwe n’ubutegetsi bagaragaje ko Leta isesagura umutungo.

Abadage ntibishimiye imiyoborere ya Chancelier Friedrich Merz