Mu butumwa yageneye abaturage kuri ki Cyumweru tariki 22 Werurwe 2020 yavuze ko abantu 12 barimo abanya-Tanzania umunani n’abanyamahanga bane bose bari kwitabwaho n’abaganga.

Ati “Ku bw’amahirwe abo yagaragayeho [coronavirus] bose bameze neza nta n’umwe urembye nta n’uwo irahitana.”

Yongeyeho ko abantu 20 basuzumwe uyu munsi bose basanze nta bwandu bafite, asaba abaturage b’igihugu cye kwirinda no gukurikiza amabwiriza bahabwa n’abayobozi.

Mu ngamba Tanzania yongeye mu bwirinzi ni uko abantu bose binjira muri Tanzania barimo abenegihugu n’abandi baturutse mu bihugu byagaragayemo coronavirus barajya mu kato k’iminsi 14 kandi bakitunga.

The Citizen dukesha iyi nkuru yanditse ko Perezida Magufuli yasabye abaturage kwirinda kugirira ingendo mu bihugu byagaragayemo icyo cyorezo. Izo ngamba zije nyuma y’uko ibihugu nka Uganda bitangaje umuntu wa mbere, naho ibihugu nka Ghana na Rebupulika Iharanira Demokarasi ya Congo byatangaje aba mbere bapfuye.

Ni icyemzo kandi kije ibihugu nk’u Rwanda byamaze gufunga imipaka mu rwego rwo kwirinda ari nacyo cyemezo gikomeye ibihugu bifata. Ni nyuma y’uko Guverinoma nyinshi zamaze gufunga amashuri, insengero, imisigiti n’ibibuga by’indege.

Afurika itaragezweho n’icyorezo kigitangira ikomeje kugaragaza ko imibare iri kwiyongera muri iyi minsi. Afurika imaze kugira abanduye coronavirus bagera ku 1100 aho abarenga 1000 bari mu bihugu byo munsi y’ubutayu bwa Sahara.

Ni mu gihe Ishami ry’Umuryango w’Abibumbye rihangayikishijwe nuko isuku nke, ubucucike mu mijyi, ibura ry’ibikoresho no kutagira abakozi bahuguwe bishobora gukoma mu nkokora ingamba zo kurwanya coronavirus mu bihugu bimwe na bimwe.

Abantu 12 nibo bamaze kwandura coronavirus muri Tanzania