Abagera kuri 300 muri 3,700 bari muri ubwo bwato bwa Diamond Princess nibo basuzumwe ndetse byitezwe ko umubare w’abanduye ushobora kwiyongera.

Igikorwa cyo gupima abagenzi bari muri ubwo bwato, cyatangiye ubwo byagaragara ko umugabo w’imyaka 80 y’amavuko wo muri Hong Kong wari uburimo agaragayeho Coronavirus.

Abandi bantu 3,600 bari mu bundi bwato bwomokeye muri Hong Kong na bo bahise basuzumwa.

Inzego z’ubuzima mu Bushinwa, zikomeje gushyira imbaraga mu kugenzura niba icyorezo kidakomeza gukwirakwira. Abarenga miliyoni 18 bari mu Burasirazuba bw’icyo gihugu basabwa kutava mu ngo.

Muri Wuhan, aho icyorezo cya Coronavirus cyatangiriye inyubako za leta nini, 11 zirimo iziberamo imikino zahinduwe ibitaro kugira ngo haboneke ibitanda 10,000 byakira abarwayi. Ni mu gihe ibindi bitaro bibiri bishya byubatswe nyuma y'aho Coronovirus itangiriye.

Perezida w’u Bushinwa, Xi Jinping yavuze ko ingamba bashyizeho ziri gutanga ibisubizo byiza, nkuko itangazamakuru rya leta ryabitangaje. Yavuze ko u Bushinwa bwiyemeje kandi bushoboye gutsinda intambara y’iyo virus.

Ishami ry’Umuryango w’Abibumbye ryita ku Buzima, OMS, riherutse gutangaza ko Coronovirus ari icyorezo gihangayikishije Isi ariko atari gishya cyakwirakwiye ku Isi 'Pandemic'.

Imibare itangazwa n’u Bushinwa igaragaza ko abantu bamaze kwandura coronavirus nshya ari 17.238 bo mu Bushinwa na 148 bo mu bindi bihugu.

Mu bamaze gupfa harimo 361 bo mu Bushinwa n’umwe wo hanze yabwo, waguye muri Philippines ku wa Gatandatu w’icyumweru gishize. Hari na 480 bamaze gukira, basezerewe basubira mu miryango yabo.

Iyi ndwara yagaragaye bwa mbere mu Bushinwa, uretse abenegihugu bayanduye, Minisiteri y’Ububanyi n’Amahanga y’u Bushinwa yatangaje ko hari abanyamahanga 16 bamaze kwandura, nubwo ibihugu bakomokamo bitatangajwe.