Abantu basaga 36 bapfuye barwanira amafaranga y’amakorano mu ijoro ribanziriza ubunani mu Mujyi wa Shanghai wo mu Bushinwa.

Guverinoma y’u Bushinwa yatangaje ko abari bateraniye mu gace kitwa Chen Yi bizihiza Ubunani batangiye umuvundo mbere gato ya saa sita z’ijoro bagwiriranye barwanira amafaranga y’amahimbano bamwe bagapfa abandi bagakomereka.

Umugabo umwe wari uhari, yavuze ko hari uwajugunye amafaranga menshi y’amahimbano bagatangira kuyarwanira.

Umwe mu bayatoraguye Cui Tingting yavuze ko yayajugunye amaze kubona ko ari amahimbano ariko ko benshi bayarwaniye kakahava.

Ati” Byari agahomamunwa, abari baturi imbere bari baguye abandi bakagenda babanyuka bashaka amafaranga.”

Televiziyo y’u Bushinwa yatangaje ko izo noti mpimbano zagiye zimanuka nk’urubura.

Ikivunge cy’abantu bagiye bagwirirana mu kavuyo bamwe bakabura umwuka abandi bakicwa no kubakandagira. Ibinyamakuru byo mu Bushinwa bimwe byanenze Leta y’icyo gihugu ko idacungira umutekano abantu bateraniye hamwe.

Benshi mu bapfuye bari abanyeshuri 28 muri bo ab’igitsina gore.