Abasirikare ba Amerika 22 bamaze kwicirwa muri Afghanistan muri iki cyumweru, na ho Abongereza bo babarirwa muri bane.

Aba basirikare (ISAF) bayobowe n’umuryango Mpuzamahanga NATO (North Atlantic Treaty Organization) bahawe ubutumwa bwo gucunga umuntekano muri Afghanistan.

Abasirikare ba Leta Zunze Ubumwe za Amerika barindwi bishwe ku wa gatandatu; batanu baturikanwe n’igisasu mu ntara ya Kandahar yo mu majyepfo ya Afghanistan, abandi babiri barasirwa Farah mu ntara y’Uburengerazuba.

Ubu bwicanyi bufatwa ko ari ubwa mbere buteye ubwoba bwabaye ku basirikare ba OTAN uhereye mu mwaka wa 2012.

Nyuma y’ubu bwicanyi amakuru dukesha Ibiro Ntaramakuru by’Abafaransa (AFP) atangaza ko hamaze kwicwa undi musirikare umwe mu Majyaruguru ya Afghanistan.

Akarere kavugwaho kuba kicirwamo abasirikare benshi cyane ni akari ku mipaka y’ahitwa Maiwand ihuza uturere twa Kandahar na Helmand.

Umuvugizi w’ingabo mu gihugu cya Afghanistan, Qari Yousuf Ahmadi, atangaza ko umutwe w‘ibyigomeke witwaje intwaro (Taliban), ukomeje gutanga amakuru kuri e-mail avuga ko ugomba gukomeza kugaba ibitero ku ngabo za Amerika ndetse n’iz’Abongereza ziri muri iki gihugu.