Afurika y’Epfo ni cyo gihugu cyugarijwe cyane na Covid-19 muri Afurika, aho kimaze gupfusha abarenga ibihumbi 95, mu bantu barenga miliyonii 3.6 banduye iki cyorezo. Iki gihugu nicyo cya mbere cyatangajwemo ubwoko bushya bwa Covid-19 buzwi nka Omicron bwanateje inkubiri ya kane y’ubwiyongere bw’icyo cyorezo muri icyo gihugu.

Kuva mu 2020, Afurika y’Epfo yashyizeho ingamba zo kwirinda Covid-19 kimwe n’ibindi bihugu, ariko zimwe muri izo ngamba zatangiye gukurwaho, nk’uko byemejwe n’Inama idasanzwe y’Abaminisitiri iherutse guterana.

Iyi nama yemeje ko abarwayi ba Covid-19 ariko batagaragaza ibimenyetso, batazongera gusabwa kwishyira mu kato k’iminsi 10. Ikindi ni uko igihe cyo kwishyira mu kato nacyo cyagabanyijwe, kivanwa ku minsi 10 gishyirwa ku minsi irindwi ku barwayi bafite ibimenyetso gusa.

Ingamba zo gushyiraho intera ya metero imwe mu mashuri nayo yakuweho, amashuri akaba asabwa kongera gutangira nk’uko byari bisanzwe, abanyeshuri bakigira ku ishuri kandi bakicara begeranye nk’uko byahoze mbere ya Covid-19.

Leta yatangaje ko koroshya izi ngamba byatewe n’uko ubwandu bwagabanyutse cyane bitewe n’ibikorwa byo gukingira Covid-19 byiyongereye muri icyo gihugu.

Ku rundi ruhande, Leta iri guhangana n’ibibazo byatewe n’ingamba zo kwirinda Covid-19, aho byari bimaze kugaragara ko umubare munini w’abana bakennye bavuye mu ishuri kuko uburyo bwo kwiga hakoreshejwe internet butabashobokeye.

Mu bihe biri imbere, birumvikana ko aba bana bavuye mu ishuri bafite ibyago byinshi byo kuzavamo abanyarugomo.

Afurika y’Epfo itangaza ko ikigero cy’ubwirinzi kuri Covid-19 kimaze kugera hejuru ya 60% mu gihugu.