Abasirikare 14 mu bavaga mu gikorwa cyo gucunga umutekano w’amatora y’umukuru w’igihugu, baguye mu mutego bategewe mu misozi ya Kabylie mu burasirazuba bw’umurwa mukuru Alger wa Algeria, baricwa.

Nk’uko tubikesha BBC, aba basirikare baguye mu mutego w’umutwe w’abayisiramu bitwaje intwaro (AQIM ) mu ijoro ryo ku wa Gatandatu rishyira ku cyumweru tariki 20 Mata 2014.

Amakuru aturuka mu nzego z’umutekano muri Algeria, avuga ko abasirikare 11 aribo babanje gupfa ku ikubitiro, nyuma batatu bandi bakaza gushiramo umwuka hashize umwanya.

Abasirikare bapfuye bari mu modoka ya gisirikare yavaga mu gikorwa cyo gucunga umutekano w’amatora y’umukuru w’igihugu yabaye ku wa kane w’icyumweru gishize, bakaba bishwe n’agatsiko k’iterabwoba kari kabategeye muri iyi misozi.

Perezida Abdelaziz Bouteflika yongeye gutsinda amatora ku majwi 81/100 by’ayatoye yose, ubu akaba agiye kuyobora igihugu ku nshuro ya kane.

Inzego za leta zivuga ko zamaze koherezayo ingabo zo guhashya izi nyeshyamba z’abaterabwoba. Hari n’andi makuru avuga ko uretse aba bapfuye hari n’abandi barenga icumi bakomeretse.

Itangazo rya Minisiteri y’Ingabo muri iki gihugu rivuga ko n’ubusanzwe aka gace gasanzwe ari indiri y’imitwe y’iterabwoba.

Ingabo za Algeria zemeje ko zikomeje kurwanya bikomeye iyi mitwe y’iterabwoba ndetse magingo aya zikaba zimaze kwivuga abasaga 37.

[email protected]