Umuyobozi wa Polisi mu mujyi wa Charleston ahabereye ubwo bwicanyi, Gregory Mullen, yatangaje ko abantu umunani biciwe imbere mu rusengero rw’Abametodisite (Emanuel African Methodist Episcopal Church) mu gihe undi umwe yishwe nyuma, Polisi ikaba irimo ishakisha umuntu waba wagize uruhare muri ubu bwicanyi.

Senateri Clementa Pinckne, ari mu bishwe nkuko byatangajwe n’uharanira uburenganzira bwa muntu Rev Al Sharpton abinyujije kuri twitter.

Polisi yahise igera ahabereye ubwo bwicanyi

Iki gitero cyagabwe ahagana saa tatu z’ijoro muri Leta Zunze Ubumwe za Amerika mu ijoro ryo kuwa Gatatu rishyira kuwa Kane (mu rukerera mu masaha y’i Kigali mu Rwanda kuri uyu wa Kane).

Iki gitero cyatumye ibikorwa bya Jeb Bush byo kwiyamamariza kuyobora Leta Zunze Ubumwe za Amerika byari biteganyijwe muri ako gace kuri uyu wa Kane bihita bisubikwa.

Abategura ibikorwa byo kwiyamamaza kwe, batangaje ko bifatanyije n’abantu ndetse n’imiryango yagizweho ingaruka n’iki gitero.

Abantu bari bahateraniye Polisi yahise ibasaba gusubira inyuma, umutekano urakazwa hashyirwa na kajugujugu igenzura ako gace kose nkuko BBC yabitangaje.

Nyuma itsinda ry’abantu hafi y’urwo rusengero basenga rigizwe n’Abirabura, ryavuze ko bakeneye ibisubizo bya nyabyo by’ibintu biri kuba.

Iki gitero kibaye nyuma y’amezi abiri umugabo w’umwirabura udafite intwaro arashwe akicwa n’umupolisi w’umuzungu mu Majyaruguru ya Charleston.

Uku kurasa uyu muntu udafite intwaro byazamuye umwuka mubi n’ikibazo cy’ivanguraruhu muri uwo mujyi, nyuma uwo mupolisi aza guhanwa kubera icyaha cyo kwica.

Nyuma y'igitero, hari abishyize hamwe basenga hafi aho bumvikanye babaza impamvu y'ibi bitero

Urusengero rwagabweho igitero rwubatswe ahagana mu 1891