Ni ubutumwa bwahawe abamwunganira mu mategeko, ku wa Gatanu tariki ya 22 Kanama 2025 mu kirego cyatanzwe gishinja Abrego Garcia ibikorwa bifitanye isano no gufasha abimukira kwinjira mu gihugu mu buryo bunyuranye n’amategeko.

Mu bihe bishize uyu mugabo yoherejwe muri El Salvador yibeshyweho ko ari icyihebe nyuma Urukiko rw’Ikirenga rutegeka ko hashakishwa uburyo asubizwa muri Amerika.

Abanyamategeko ba Abrego Garcia bashinje Guverinoma gushaka gukoresha uburyo bwo kumwohereza mu kindi gihugu nko gutera ubwoba umukiliya wabo ngo yemere icyaha.

Ubutumwa bwakiriwe bugira buti “Ubu butumwa ni ukubamenyesha ko Minisiteri y’Umutekano w’Imbere mu gihugu DHS ishobora kohereza umukiliya wanyu Kilmar Armando Abrego Garcia muri Uganda bitarenze amasaha 72 guhera none hatabariwemo weekend.”

Kilmar Armando Abrego yasubijwe muri Amerika muri Kamena 2025 nyuma y’uko yari yoherejwe muri El-Salvador yibeshyweho.

Umunyamategeko wa Abrego Garcia, Simon Sandoval-Moshenberg, yabwiye CNN ko kuba umukiliya we yakoherezwa muri Uganda byaba bisa no kwihimura kwa Leta, agaragaza ko yashoboraga no koherezwa muri Costa Rica aho umuryango we ushobora no kumusura biworoheye.

Ati “Icyemezo cya Guverinoma cyo kohereza Kilmar Abrego Garcia muri Uganda kirababaje, birashimangira gukoresha sisitemu y’abinjira n’abasohoka mu kumuhana birenze hifashishijwe uburenganzira bwe ahabwa n’Itegeko Nshinga.”

“Hari amahitamo yumvikana ahari ni Costa Rica. Aho umuryango we ushobora kumusura byoroshye ariko aho kubikora gutyo bamwohereje hafi n’aho isi iherera, mu gihugu kivugwaho kutubahiriza uburenganzira bwa muntu aho adashobora no kumenya ururimi rwaho. Ubu ntabwo ari ubutabera ni ukwihorera.”

Abanyamategeko be bakomeje gusaba ko yakoherezwa muri Costa Rica aho kuba Uganda kuko ngo icyo gihugu cyiteguye kumwakira nk’impunzi kandi agafashwa mu buryo bwemewe n’amategeko nk’uko inyandiko yohererejwe Amerika binyuze muri Ambasade yayo muri Costa Rica ibisobanura.

Bagaragaje ko kuba umukiliya wabo akomeje gusabwa kwemera icyaha cyangwa bakamwohereza muri Uganda aho ashobora kubaho mu buzima bugoye bisa no kumwihimuraho.

Bavuze kandi ko bitangaje kubona Guverinoma isaba uregwa guhitamo kwiyemerera icyaha cyangwa koherezwa mu kindi gihugu, bagasaba ko ikirego cyateshwa agaciro bitaba ibyo akaba yakoherezwa muri Costa Rica.

Amerika ishobora kohereza Kilmar Abrego Garcia muri Uganda