Dylann Roof, ukomoka muri Columbia muri Leta ya South Carolina, yatawe muri yombi nyuma y’amasaha ane habaye ubwicanyi bwahitanye abantu 9 mu rusengero rw’Abametodisite (Emanuel African Methodist Episcopal Church) mu gitondo cyo kuwa Kane, mujyi wa Charleston.

Umuyobozi wa Polisi ya Charleston, Gregory Mullen, yabwiye abanyamakuru ko Dylann yafatiwe mu bugenzuzi polisi yakoreraga muri Carolina ya Ruguru nyuma y’amasaha ane ubwicanyi bukozwe.

Mullen yavuze ko Roof yari yicaranye n’abakirisitu mu rusengero nk’isaha imwe mbere y’uko arasa amasasu yahitanye abantu 9.

Yakomeje avuga ko ibyabaye ari ubwicanyi bw’urwango, ndetse ko bibabaje kuba umuntu ashobora kujya mu rusengero ajyanywe no guhitana inzirakarengane.

Perezida wa Leta Zunze Ubumwe za Amerika, Barack Obama, mu kiganiro n’abanyamakuru yanenze bikomeye ubu bwicanyi yavuze ko atari igikorwa cya muntu.

Yagaragaje ko igihugu kiri mu gihe cyo gutekereza ku bapfuye, anavuga ko bikwiye kongera gutekereza ku Itegeko riha abantu uburenganzira bwo gutunga imbunda.

Perezida Obama yavuze ko igitero cyagabwe mu rusengero rw’Abanyafurika kimwe n’ibindi biherutse kubagabwaho, ari ibintu bikomeje kwandika amateka mabi kuri Amerika, ndetse ko urwango rujyanye n’uruhu n’imyimerere rutera ibibazo byihariye.

Iki gitero cyagabwe mu rusengero, kije gikurikira urupfu rw’umwirabura wishwe arashwe n’umupolisi, akaza guhanirwa icyaha cyo kwica.

Dylann Roof w'imyaka 21 arakekwaho kwica abantu 9 mu rusengero

Abantu batandatu mu icyenda biciwe mu rusengero

Urusengero rwagabweho igitero rwubatswe ahagana mu 1891