Angela Merkel yateye utwatsi ubutumire bwa Trump mu nama ya G7

Yanditswe na Habimana James
Kuya 30 Gicurasi 2020 saa 10:24
Yasuwe :
0 0

Chancelière w’u Budage, Angela Merkel, yatangaje ko atazitabira ubutumire bwa Perezida wa Leta Zunze Ubumwe za Amerika, Donald Trump, mu nama y’ihuriro ry’ibihugu birindwi bikize ku Isi (G7) igomba kubera i Washington muri Kamena.

Perezida Trump yifuzaga ko aba bayobozi bakwitabira iyi nama nk’uburyo bwo kugaragaza ko icyorezo cya coronavirus kirimo gutsindwa.

Umuvugizi wa Merkel witwa Steffen Seibert, yavuze ko uyu muyobozi w’u Budage yashimiye Trump kuba yaramutumiye, ariko ko atazayitabira bitewe n’icyorezo cya coronavirus.

Yagize ati “Nk’uko bimeze uyu munsi bitewe n’uko icyorezo cya coronavirus gihagaze, ntabwo Merkel ashobora kwemera kwitabira ubu butumire ku buryo yakwerekeza i Washington.”

Merkel yatangaje ko nubwo ibikorwa by’ubucuruzi byatangiye gusubukurwa hirya no hino ku Isi ariko muri Kamena byaba bikiri kare ku buryo abantu bahurira ahantu hamwe.

Merkel yashyigikiwe na Minisitiri w’Intebe w’u Bwongereza, Boris Johnson, nawe uvuga ko byaba byiza iyi nama iteranye ku buryo abantu baba batari hamwe.

Umuvugizi w’ibiro bya Trump, Kayleigh McEnany , yavuze ko umukuru w’igihugu atekereza ko kuba abayobozi bakwitabira inama, cyaba ari igikorwa cyiza kigaragaza gutsinda coronavirus.

Yagize ati “Tuzarinda abakuru b’ibihugu bazayitabira nk’uko turinda abantu bo mu biro by’umukuru w’igihugu, White House, iyi niyo mpamvu twifuza kubona iyi nama yateranye. Turatekereza ko izaba kandi abakuru b’ibihugu benshi bazayitabira.”

Ikinyamakuru The Politico kivuga ko hari bamwe mu bakuru b’ibihugu ku mugabane w’u Burayi, bavugako Trump ashaka ko bitabira iyi nama nk’uburyo bwo kuyikoresha mu matora yo mu Ugushyingo uyu mwaka.

Kugeza ubu bamwe mu bayobozi bemeye ko bashobora kwitabira iyi nama, barimo Perezida w’u Bufaransa Emmanuel Macron, ministiri w’intebe w’u Buyapani, Shinzo Abe avuga ko ashobora kuyitabira, ariko afite impungenge ashobora kuzagaruka mu gihugu agashyirwa mu kato k’iminsi 14.

Abandi ni Minisiriri w’intebe w’u Butaliyani, Giuseppe Conte, uwa Canada Justin Trudeau na perezida w’Umuryango w’Ubumwe bw’u Burayi, Charles Michel.

Leta Zunze Ubumwe za Amerika nizo ziza imbere mu kugira abanduye coronavirus ku Isi n’abamaze gupfa.

Abamaze kwandura ni 1 793 530 mu gihe abandi 104 542. U Budage buri ku mwanya wa munani ku Isi, abanduye ni 183 019 abamaze gupfa ni 8 594.

Merkel yanze kwitabira inama yatumiwemo na Trump

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .