Aya masezerano ajyanye no kugura indi kompanyi yo muri Amerika ikora ubucuruzi bw’imikufi, amasaha n’ibikoresho bikoze mu ruhu ya Tiffany & Co kuri miliyari 16 z’amadolari.

Louis Vuitton- Moët Hennessy (LVMH), ni imwe mu masosiyete akomeye ku Isi aho ibarizwamo ibice bibiri; harimo kimwe gikora ibijyanye n’imyambaro n’ikindi gikora inzoga zo mu bwoko bwa ‘champagne’.

Kugura Tiffany bisobanuye ko iyi sosiyete ibumbiye hamwe ibikorwa byo gukora inzoga, imyambaro n’ibikoresho by’ubwiza [amavuta, imitako yo ku mubiri n’ibindi]. Ni nayo ibarizwamo ikinyamakuru Le Parisien.

Urubuga rwa Forbes rwatangaje ko nyuma y’aya masezerano na Tiffany, igiciro cy’imigabane muri LVMH cyazamutse ku buryo Bernard Arnault wari usanganywe umutungo ubarirwa muri miliyari 103 z’amadolari ari ku mwanya wa gatatu mu bakize ku Isi ashobora gusimbura Jeff Bezos na Bill Gates bari basanzwe basimburana mu kuyobora uru rutonde.

Bernard Arnault niwe uyoboye urutonde rw’abakire ku mugabane w’u Burayi.

Ku wa 25 Ugushyingo Bloomberg Billionaires Index yashyizwe hanze urutonde rugaragaza abaherwe 500 bakize kurusha abandi aku Isi aho nyuma ya Bezos ufite miliyari 111 z’amadolari na Gates ufite miliyari 110 ku mwanya wa gatatu hariho Umufaransa, Bernard Arnault, ufite umutungo mbumbe wa miliyari 103.

Warren Buffett yaje ku mwanya wa kane n’umutungo mbumbe wa miliyari 86.3$ mu gihe Mark Zuckerberg washinze Facebook yaje ku mwanya wa gatanu na miliyari 76.3$.