Ibi byakigize igihugu cya Kabiri ku Isi kigize abanduye Coronavirus bagera kuri Miliyoni. Imibare yo mu gitondo cyo kuri uyu wa 20 Kamena 2020 irerekana ko abantu 1 038 568 bamaze kwandura Coronavirus muri Brésil, abamaze gupfa ari 49 090 naho abamaze gukira ni 520 360.

Minisiteri y’Ubuzima yatangaje ko mu masaha 24 ashize yonyine handuye abarenga 54,000 naho mu minsi ine ikurikirana hapfuye abantu nibura 1200 ku munsi.

Brésil ibaye igihugu cya Kabiri kigize miliyoni y’abanduye Coronavirus nyuma ya Leta zunze Ubumwe za Amerika zimaze kugira 2 297 338.

Umwarimu mu bijyanye n’ubuvuzi muri Kaminuza ya Sao Paulo, Alexandre Naime Barbosa, yavuze ko umubare nyawo w’abanduye Coronavirus muri Brésil, ushobora kuba ugeze muri miliyoni eshatu ndetse ushobora kuzagera kuri miliyoni 10. Yasobanuye ko miliyoni imwe ari bake kuko hari abo leta idatangaza.

Ishami ry’Umuryango w’Abibumbye ryita ku buzima OMS riherutse gutanga umuburo rivuga ko icyo cyorezo kigeze mu cyiciro cyo kuzamura ubukana bundi bushya kubera ibihugu biri koroshya ingamba zo kukirinda.

Nyuma ya Leta zunze Ubumwe za Amerika, Brésil yabaye igihugu cya kabiri kigize miliyoni y’abantu banduye Coronavirus