Putin yashyiriweho impapuro zo kumuta muri yombi, zatanzwe n’urukiko Mpuzamahanga mpanabyaha (ICC).

Ashinjwa ibyaba byibasiye inyokomuntu bishingiye ku bana bakuwe mu duce twahoze ari utwa Ukraine bakimurirwa mu Burusiya, mu ntambara ibihugu byombi bimazemo umwaka urenga.

Mu kiganiro Lula yagiranye n’ikinyamakuru cyo mu Buhinde, Firstpost, yavuze ko we izo mpapuro zashyiriweho Putin ntacyo zimubwiye.

Yijeje ko umunsi Putin azifuza gusura Brésil ahawe ikaze, kuko ibya ICC nta gaciro abiha.

Ati “Nemeza ko Putin byoroshye kuza muri Brésil. Ndabamenyesha ko ari njye Perezida wa Brésil, bivuze ko nahaza ntawe uzamuta muri yombi.”

U Burusiya nta gaciro buha ICC kuko butari mu bihugu byashyize umukono ku masezerano ashyiraho urwo rukiko. Icyakora icyo gihugu cyanahakanye ibyaha bishinjwa Putin, kivuga ko abana ashinjwa gutandukanya n’imiryango yabo bagiye bahungishwa intambara, ngo bacungirwe umutekano.