Abarwanashyaka batatu b’ishyaka rya CNDD-FDD riri ku butegetsi mu Burundi barashwe n’abantu bivugwa ko bari bambaye impuzankano ya Gisirikare, muri komini ya Gisuru, intara ya Ruyigi mu Burasirazuba bw’igihugu.

Polisi y’igihugu mu Burundi yemeje ko aba bantu bishwe baboshywe, ndetse ngo ababishe bakomereje ku cyicaro cy’iri shyaka mu Gisuru hafi y’umupaka wa Tanzaniya, batwika ibendera ry’ishyaka mu ijoro ryo ku cyumweru.

Umuvugizi w’ishyaka CNDD-FDD Onesime Nduwimana yabwiye AFP ko ubu bwicanyi bakeka ko bwakozwe n’intagondwa zitavuga rumwe n’ubutegetsi buriho, bashaka guhungabanya amatora y’umukuru w’igihugu ateganyijwe muri uyu mwaka.

Yashimangiye ko afite amakenga ko ibi bikorwa by’izi ndagondwa byaba bigamije ‘kubiba urwango’ mu baturage kugira ngo habeho kwihorera, ibintu bikadogera.

Iki gitero cyo mu Kayigi, kije gikurikira intambara ikaze yabaye mu cyumweru gishize hagati y’ingabo za leta n’abarwanyi bitwaje imbunda, leta yemeza ko baturutse muri Repubulika Iharanira Demokarasi ya Congo.

Ishyaka CNDD-FDD ryahoze riyobowe na Perezida uriho mu Burundi Pierre Nkurunziza warwanyaga ubutegetsi bwariho icyo gihe. Benshi bakomeje kuvuga ko Perezida Nkurunziza ashaka kwiyamamariza manda ya gatatu yo kuyobora u Burundi, ariko magingo aya ntarerura ngo yemeze ko aziyamamaza.