Umuyobozi wa Polisi ikorera i Toronto muri Canada, Mark Saunders, yatangarije CNN ko umushoferi ukekwaho ubwo bugizi bwa nabi, Alek Minassian w’imyaka 25 yahise atabwa muri yombi nyuma y’iminota 3o Polisi ihawe amakuru.

Bamwe mu bagenzi bari muri uwo muhanda barimo uwitwa Chelsea Luelo, batangaje ko babonye bisa n’aho uwo mushoferi yabagonze ku bushake.

Saunders yemeje ko nk’uko ubuhamya bw’ababonye iyo mpanuka bubivuga, uwo mushoferi yabagonze yabigambiriye.

Minisitiri ufite mu nshingano Ubwikorezi n’Umutekano wo mu Muhanda no gukumira Impanuka, Ralph Goodale, yavuze ko ibyabaye nta sano bifitanye n’umutekano w’igihugu.

Minisitiri w’Intebe wa Canada, Justin Trudeau, yihanganishije ababuriye ababo muri iyo mpanuka, yavuze ko itari ifite “ishingiro.”

Yakomeje ashimira abatanze amakuru ku gihe, yizeza ko hazakomeza gukorwa ibishoboka byose mu kubungabunga umutekano wo mu muhanda.

Yagize ati “Turi kugenzura iki kibazo twitonze kandi tuzakorana n’abafatanyabikorwa mu ishyirwa mu bikorwa ry’amategeko mu gihugu ku buryo Abanya-Canada bose bizera umutekano.”

Ibiro bya Leta Zunze Ubumwe za Amerika nabyo byasohoye itangazo ryihanganisha abaturage bo muri Canada nyuma y’impanuka yahitanye ubuzima bw’abantu 10, abandi benshi bagakomereka.

Si ubwa mbere impanuka zikozwe ku bushake zibaye kuko mu myaka ishize hari izagiye ziba mu mijyi itandukanye nk’uwa Barcelona muri Espagne, i New York, i London mu Bwongereza, i Nice mu Bufaransa n’ahandi zikozwe muri ubwo buryo.

Polisi igera ahabereye impanuka yaguyemo abantu icumi

Umushoferi yashoye imodoka mu gikundi cy’abagenzi 10 barapfa, 15 barakomereka

[email protected]