Coronavirus ku wa 11 Kamena: Brésil yapfushije abantu 1300

00:00:00 IGIHE NETWORK

KINYARWANDA

ENGLISH

FRANCAIS

Coronavirus ku wa 11 Kamena: Brésil yapfushije abantu 1300

Yanditswe na Habimana James

Kuya 11 June 2020 saa 09:55

Yasuwe :

Yavuzweho:

Igihugu cya Brésil ubu kiri mu byugarijwe na coronavirus cyane ku Isi, Ishami ry’Umuryango w’Abibumbye ryita ku Buzima, OMS, ryatangaje ko kuri uyu wa Gatatu cyapfushije abantu 1300 mu gihe abandi 33 100 banduye.

OMS kandi yatangaje ko ubwandu bukomeje kwiyongera ku Isi. Mu gihe ku wa Kabiri abanduye bari 122 732 naho abapfuye bakaba 4900, kuri uyu wa Gatatu handuye abantu 136 547 mu gihe abapfuye ari 5326.

Leta Zunze Ubumwe za Amerika zo zapfushije abantu 982 mu gihe abanduye ari 20 852 .

Ku rwego rw’Isi, OMS ivuga ko abamaze kwandura ari 7 460 415, abamaze gupfa ni 419 049 mu gihe abamaze gukira ari 3 779 035.

Nubwo Brésil yugarijwe na coronavirus, Perezida Jair Bolsonaro aherutse kuvuga ko igihugu cye gishobora kwivana mu Ishami ry’Umuryango w’Abibumbye ryita ku Buzima, OMS, kuko uyu muryango ukomeje kugaragaza ukubogama.

Uyu muyobozi kandi akomeje kuvanaho ingamba zose zigamije kwirinda ikwirakwira ry’iki cyorezo.

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa benshi, abanduye ni 2 066 508, abamaze gupfa bo ni 115 137. Brésil iza ku mwanya wa Kabiri aho ifite abanduye 775 184 naho abamaze gupfa ni 39 797, u Burusiya buza ku mwanya wa Gatatu kuko bufite abanduye 493 657, hamaze gupfa 6 358.

Mu Bwongereza handuye 290 143, hamaze gupfa 41 128. Muri Espagne handuye 289 360 hamaze gupfa 27 136.

Ku mugabane wa Afurika hamaze kugaragara abantu 212 092 banduye Coronavirus, abamaze gupfa ni 5 718 naho abakize ni 97 185.

Afurika y’Epfo iri imbere mu kugira abafite ubwandu benshi kuko ari 55 421, abamaze gupfa ni 1 210, ikurikirwa na Misiri ubu ifite abamaze gupfa benshi kuri uyu mugabane kuko bageze kuri 1 342 naho abamaze kwandura ni 38 284.

Muri Afurika y’Iburasirazuba, Kenya ni cyo gihugu cyugarijwe cyane kuko hamaze kwandura abantu 3 094, hapfuye 89.

U Rwanda rufite abanduye 476, hamaze gupfa abantu babiri ariko hamaze gukira abandi 307, muri Uganda hari abanduye 665, Tanzania ifite abanduye 509 hamaze gupfa 21, mu Burundi handuye abantu 83 hapfa umwe naho muri Sudan y’Epfo hamaze kwandura abantu 1,604, hamaze gupfa 19.

Mu bihugu bihana imbibi n’u Rwanda, Repubulika Iharanira Demokarasi ya Congo niyo yibasiwe cyane, kuko ubu ifite abanduye 4 390 barimo 96 bamaze gupfa.