Urukiko rwa Cote d’Ivoire rwanze ko uwahoze ayobora icyo gihugu, Laurent Gbagbo, kuri ubu ufungiye mu Rukiko Mpuzamahanga Mpanabyaha rwa (ICC), agirwa umukuru w’ishyaka rye (FPI).

Inkuru ya RFI, ivuga ko abunganizi ba Laurent Gbagbo ukurikiranweho na ICC ibyaha byo guhohotera ikiremwa muntu, bavuga ko bazajuririra iki cyemezo.

Pascal Affi N’Guessan uyobora iri shyaka kuri ubu, akaba anafatwa nk’umukeba wa Gbagbo, bivugwa ko kuva Ukuboza kwatangira, yakomeje kunyura hirya no hino ngo aburizemo kandidatire ya Gbagbo.

Gbagbo ufungiye ICC, akurikiranweho kugira uruhare mu mvururu zakurikiye amatora ya 2010 yatsinzwe akanga kurekura ubutegetsi, imvururu zanaguyemo abantu barenga ibihumbi bitatu.