Inzego z’ubuzima mu Bufaransa zagaragaje ko tariki 3 Gicurasi iki gihugu cyapfushije abantu 135, muri Espagne 164 naho mu Butaliyani babaye 174.

Muri Leta Zunze Ubumwe za Amerika naho imibare igaragaza ko abapfa barimo kugabanuka, kuri iki Cyumweru hapfuye abantu 1 154, ni mu gihe ku wa Gatandatu ho hari hapfuye 1 691 .

Mu gihugu cy’u Bwongereza ho, kuri iki Cyumweru bapfushije abantu 315.

Kugeza ubu imibare y’Ishami ry’Umuryango w’Abibumbye ryita ku buzima, OMS, igaragaza ko abantu miliyoni 3.5 bamaze kwandura Coronavirus ku Isi, ibihumbi 248 bamaze gupfa naho miliyoni 1.1 bamaze gukira.

Leta Zunze Ubumwe za Amerika zikomeje kuza imbere mu kugira umubare w’abanduye n’abamaze gupfa. Iki gihugu kimaze kugira abanduye miliyoni 1.1, abamaze gupfa ni ibihumbi 68.6.

Espagne iza ku mwanya wa kabiri kuko handuye abantu ibihumbi 247, hamaze gupfa ibihumbi 25, mu Butaliyani handuye ibihumbi 210 hamaze gupfa ibihumbi 28, mu Bwongereza handuye ibihumbi 186, hamaze gupfa ibihumbi 28.

Mu Bufaransa handuye ibihumbi 168, hamaze gupfa ibihumbi 24.

Ku mugabane wa Afurika wose hamaze kugaragara abantu ibihumbi 45 banduye Coronavirus, abamaze gupfa basaga 1800 naho abakize ni ibihumbi 15.

Afurika y’Epfo iri imbere mu kugira abafite ubwandu bwinshi kuko ari ibihumbi 6.7, abamaze gupfa barenga 130, ikurikirwa na Misiri ifite abanduye ibihumbi 6.4 naho abapfuye barenga 400.

Algeria nicyo gihugu gifite abamaze gupfa benshi kuri uyu mugabane barenga 400 mu gihe abanduye ari ibihumbi 4.4.

Muri Afurika y’Iburasirazuba, igihugu kiza imbere mu bwandu bwinshi ubu ni Tanzania kuko hamaze kwandura 480 hapfuye 16, Kenya iraza ku mwanya wa kabiri handuye 465 hapfuye 24, u Rwanda rufite abanduye 259 abamaze gukira ni 124, muri Uganda ho hamaze kwandura 89, mu Burundi handuye abantu 15 hapfa umwe naho muri Sudani y’Epfo hamaze kwandura abantu 46.