Chargé d'Affaires wa Amerika yahamagajwe ku wa 27 Kanama 2025.

Kuva Trump yajya ku butegetsi yagaragaje ko azahwema ari uko Greenland ibaye iya Amerika byuzuye ku kiguzi cyose bizasaba ndetse anagaragaza ko nibinasaba kwisunga imbaraga za gisirikare na byo bizakorwa.

Trump avuga ko impamvu z’umutakano ari zo zimuhatira kwigarurira Greenoland ikungahaye ku mutungo kamere ndetse ntatinye kuvuga ko n’igisirikare gishobora gukoreshwa mu kuyigarurira.

Televiziyo ya Danemark yatangaje ko hari amakuru ava mu nzego z’umutekano, avuga ko hari Abanya-Amerika batatu bafite imikoranire na Trump bari kugerageza gucamo ibice umubano hagati ya Greenland na Danemark.

Abo Banyamerika babonywe bakusanya amakuru yose ajyanye n’ingingo nyinshi Danemark itumvikanagaho n’abo muri Greenland, harimo kubambura abana babo, guhatira abaturage kuboneza urubyaro n’izindi.

Minisitiri w’Ububanyi n’Amahanga wa Danemark, Lars Lokke Rasmussen, yabikomojeho agira ati: “Turabizi ko hari ibihugu bikomeje gushaka kumenya icyo Greenland itekereza ku Bwami bwa Danemark. Ntibyatunguranye rero kubona hari abagerageza kwivanga mu byacu n’ahazaza hacu.”

Yakomeje avuga ko kugerageza kwivanga mu miyoborere ya Danemerk Bitemewe, ari na yo mpamvu yasabye ho hahamagazwa Chargé d'Affaires kugira ngo baganire kuri iyo ngingo.

Ubushakashatsi bwakozwe muri Mutarama 2025, bwagaragaje ko abaturage 57,000 ba Greenland bifuza kwigenga nk’igihugu, ariko badakozwa ibyo kuyoborwa na Leta Zunze Ubumwe za Amerika.