Ni ibiganiro byabaye ku wa 14 Mutarama 2026. Byabaye mu gihe Perezida wa Amerika yakomeje kugaragaza inyota afitiye iki kirwa, ndetse agaragaza ko impamvu agishaka cyane ari uko ari ingenzi cyane mutekano wa Amerika na sisiteme y’umutekano izwi nka ‘Golden dome’ iri kubakwa.

Trump kandi yari aherutse kugaragaza ko niba kwiyomekaho iki kirwa ku neza bitakunda, yiteguye no gutanga amafaranga akakigura ariko abayobozi ba Greenland na Denmark bamusubiza bamubwira ko kitagurishwa.

Greenland ni cyo kirwa kinini ku Isi, kikaba gituwe n’abantu hafi ibihumbi 57. Kuva mu 1979, kigenzura inzego nyinshi zacyo keretse urw’umutekano n’urw’ububanyi n’amahanga rugenzurwa na Denmark.

Ubwo Trump yasubiraga ku butegetsi muri Mutarama 2025, yagaragaje ko yifuza cyane iki kirwa bitewe n’ahantu giherereye n’umutungo kamere gifite, ndetse bivugwa ko ashobora gukoresha imbaraga z’igisirikare mu kucyomeka kuri Amerika, mu gihe ibiganiro bitatanga umusaruro.

Abayobozi ba Greenland na Denmark, batangiye ibiganiro na Amerika ku byo kwiyomekaho Greenland