Trump waraye ageze i Miami, biteganyijwe ko agezwa mu rukiko saa cyenda zo muri uwo mujyi, ni ukuvuga saa moya z’umugoroba ku isaha ngengamasaha (GMT).

Ashinjwa ibyaha bitandukanye bikomoka ku nyandiko zirimo amabanga ya Leta yatwaye ubwo yavaga ku butegetsi mu 2021. Ubusanzwe nta muyobozi wa Amerika wemerewe kubika inyandiko za Leta iwe mu rugo, by’umwihariko mu gihe atakiri mu nshingano.

Ubushinjacyaha buvuga ko Trump yatwaye izo nyandiko zisaga ijana akazibika mu nyubako ye izwi nka Mar-a-Lago ndetse zigafatwa nabi kuko zimwe zabitswe mu bwogero izindi mu bwiherero.

Ni inyandiko bivugwa ko harimo izari zibitse amabanga akomeye nk’ingano y’ibisasu kirimbuzi Amerika ibitse n’ibindi bihugu ndetse n’ibihugu Amerika ishobora gutera mu gihe byaba byavogereye umutekano wayo.

Trump arajyana mu rukiko n’uwahoze ari umukozi we wa hafi Walt Nauta, ushinjwa gufatanya na shebuja bakajijisha ubutabera bagamije guhisha ibimenyetso ngo izo mpapuro zitagaragara.

Meya wa Miami, Francis Suarez yatangaje ko inzego z’umutekano ziteguye neza kurinda abantu basaga ibihumbi 50 bashobora kuza gushyigikira Trump ubwo aba ari mu rukiko.

Trump ni we muntu wa mbere wayoboye Amerika ugiye kugezwa mu nkiko aregwa n’ubushinjacyaha bukuru, ku byaha bishobora kumujyana muri gereza biramutse bimuhamye.

Trump n’abamushyigikiye bahakana ibyo bashinjwa, ahubwo bakavuga ko ari ukumwibasira kuri gukorwa na Perezida Joe Biden ngo Trump ataziyamamaza mu 2024.

Ibyaha 37 Trump ashinjwa byose biramutse bimuhamye, igiteranyo cy’igifungo cy’ibyo byaha kirenga imyaka 400.

Donald Trump aragezwa mu rukiko kuri uyu wa Kabiri