Kuva mu myaka 9 ishize, ikinyamakuru Charlie Hebdo cyakunze kujya cyibasira idini ya isilamu, aho cyifashishije ibishushanyo bitandukanye cyagiye kigaragaza mu nkuru zacyo amashusho y’intumwa y’Imana Mohamed (Imana imuhe amahoro n’umugisha), ibi bifatwa n’abayisilamu aho bari hose ku isi nk’igikorwa kigayitse, kizira kikaziririzwa ndetse kidakwiye gukorwa n’umuntu uwari we wese uhumekera ku isi y’abazima.

Mu gihe rero hirya no hino hakomeje kuvugwa igitero iki kinyamakuru cyagabweho n’abasore babiri b’abavandimwe b’abayisilamu b’abahezanguni Chérif na Saïd Kouachi ku itariki 7 Mutarama uyu mwaka, hari benshi batazi neza icyaba cyarateye umujinya w’umuranduranzuzi watumye aba bavandimwe bibasira iki kinyamakuru; muri iyi nkuru rero twifuje kubanyuriramo muri macye icyo Charlie Hebdo ipfa n’abayoboke b’idini ya Isilamu muri rusange, ari nayo ntandaro yateye kwibasirwa kw’iki kinyamakuru ku nshuro zirenze imwe.

Amakimbirane hagati y’iki gitangazamakuru n’amadini atandukanye yatangiye kuva kigishingwa mu mwaka wa 1970 nk’uko cyagiranaga ibibazo n’abandi bantu banyuranye cyakunze kujya gishushanya mu buryo bwuje urwenya ariko rimwe na rimwe buvanze n’urukozasoni, cyane cyane ibyamamare, Charlie Hebdo yarushijeho gukaza umurego muri Gashyantare 2006, ubwo yashyiraga ahagaragara ibishushanyo 12 by’Intumwa y’Imana Mohamed, byari byarakozwe n’ikindi gitangazamakuru cyo muri Danemark cyitwa “Jyllands-Posten”.

Muri iyi nomero Charlie Hebdo yagaragazaga Mohamed nk'utishimiye na gato kuba akundwa n'Intagondwa z'abayisilamu, we ubwe yivugira ati "Biragoye gukundwa n'ibigoryi..."

Icyo gihe Umusigiti mukuru wa Paris ndetse n’ihuriro ry’abayisilamu mu Bufaransa (UOIF) bahise barega “Charlie Hebdo”, ariko iki gitangazamakuru kiza gutsinda urubanza hatitawe ku buryo cyari cyababaje abayisilamu.

Muri Nzeri 2012, iki gitangazamakuru “Charlie Hebdo” cyongeye gushyira hanze ibishushanyo byerekana Intuma y’Imana Mohamed mu yindi shusho, byaje no gutuma Leta y’u Bufaransa ifunga amashuri na za Ambasade zayo mu bihugu bisaga 20, kubera gutinya ko Abayisilamu bakwihorera bikomeye kubera ibyo bishushanyo byiyongeraga kuri filimi iharabika idini ya Isilamu yari iherutse gusohoka.

Kanda hano urebe amashusho (Video) aharabika idini ya Islam yateje ibibazo byinshi, maze ibyayikinwemo, igitangazamakuru cya Charlie Hebdo gihitamo kubishyira mu bishushanyo.

Kuri iki gishushanyo Charlie Hebdo yerekanaga Umuyahudi arimo acunga Mohamed ku igare ry'abafite ubumuga

Nyuma yo kwerekana intumwa y’Imana Mohamed ahetswe ku kagare n’umuyahudi muri nomero yise "Intouchables", hari hatahiwe Abagatulika, aho yashushanyije Imana, Yesu na Roho Mutagatifu bari kurongorana bya gitinganyi bagamije gusubiza Musenyeri Vingt-Trois w’ i Paris wavugaga arwanya abaryamana bahuje ibitsina.

Usibye Abayisilamu, Charlie Hebdo yakunze no kwibasira abakirisitu: aho yashushanyije Imana, Yesu na Roho Mutagatifu bari kurongorana bya gitinganyi

Ibi iki gitangazamakuru cyabisohoye muri nomero cyise "Mgr Vingt-Trois a trois papas : le Père, le Fils et le Saint-Esprit", yakurikiraga iyo cyise "Charia Hebdo" n’indi cyise les "intouchables".

Aha berekanaga Mohamed asomana n'Umwanditsi mukuru wa Charlie Hebdo bavuga ko urukundo rurusha imbaraga urwango

Muri nomero bise " L’Amour plus fort que la Haine", yo kuwa 9 Ugushyingo 2011, bashushanyije Intumwa y’Imana Mohamed asomana na Charb, umwanditsi mukuru wa Charlie Hebdo (umwe mu barashwe agahita apfa mu gitero cyagabwe kuri iki gitangazamakuru mu cyumweru gishize), ibi nabyo ntibyakwihanganirwa n’abayisilamu ndetse benshi icyo gihe barabigaragaje.

Ibi bikorwa byose byagiye bitera umujinya w’umuranduranzuzi abayisilamu aho bari hose ku isi, ndetse kuri benshi ibi bishushanyo by’intumwa y’Imana Mohamed byasaga nkaho Charlie Hebdo yakoraga uko ishoboye ngo ikoze agati mu jisho ry’abayisilamu kandi yari izi neza ko ibikorwa nk’ibi byo gushushanya Mohamed ahanini ingaruka zabyo ari ugusembura intagondwa z’abayisilamu.

Mu gihe rero hari abakomeje kwifatanya n’abaguye mu gitero cyagabwe kuri Charlie Hebdo aho babigaragaza mu ntero bakoresha igira iti "Je suis Charlie", hari n’abandi badashyigikiye ibyo iki kinyamakuru cyakomeje kujya kirengaho nkana bakoresha intero igira iti "Je ne suis pas Charlie".

Kenshi mu bihugu by'abanyaburayi na USA bakunze kugaragaza ko gushushanya Mohamed ari uburenganzira bwa buri wese nubwo bikomeretsa abayisilamu, mu gihe hari byinshi byashushanywa cyangwa bikavugwa ku bayahudi ubikoze akaba yabihanirwa bikomeye muri ibyo bihugu

Aha Charlie Hebdo yashushanyije nanone intumwa y'Imana Mohamed yambaye ubusa, yari nyuma y'ishyirwa ahagaragara rya filimi yiswe "L’Innocence des musulmans" yasebyaga abayisilamu

Iki gishushanyo aho Charlie Hebdo yerekanaga Mohamed apfukamye ari gusenga yambaye ubusa cyiswe "Une etoile est nee" cyashavuje abayisilamu bose babashije kugitera imboni; cyerekanaga ubugabo bw'iyi ntumwa y'Imana, gusa hahishwa igice kimwe cy'ikibuno hifashishijwe inyenyeri

Nomero nshya ya Charlie Hebdo nyuma y’ibitero byayigabweho igiye kujya ku isoko nayo igiye gusohokamo amashusho ya Mohamed

Nubwo iki kinyamakuru giherutse kwibasirwa n'abahezanguni nticyashizwe; iyi ni nomero nshya yacyo igiye gushyirwa ku isoko muri iki cyumweru kuwa Gatatu tariki 15 Mutarama 2015, nanone Charlie Hebdo yongeye gushushanya intumwa y'Imana Mohamed ku buryo hibazwa niba koko uyu murongo cyafashe wo gushavuza uko bishoboka kose miliyari 1,5 y'abayisilamu ku isi ukwiye