Tariki ya 14 Ugushyingo 2014 amashyirahamwe nyarwanda yo mu Bubiligi yigenga Ibuka-Mémoire & Justice ASBL, Collectif des Parties Civiles ASBL na Mpore ASBL, yishyize hamwe yandikira urwandiko rusaba ko film " Hôtel Rwanda" itakwerekanwa nkuko byari byatangajwe mu gikorwa cyo kuyerekana cyari gukurikirwa n’ibiganiro byari kuyoborwa na Paul Rusesabagina tariki ya 2 Ukuboza saa moya n’igice mu cyumba cy’inama y’ubujyanama ya Komine Kraainem iherereye mu mujyi wa Bruxelles mu Bubiligi.

Aya mashyirahamwe nyuma yo gusaba iri hagarikwa akabimenyesha Burugumesitiri Véronique Caprasse uyobora Komine Kraainem, akamugezaho mu nyandiko no mubiganiro byihariye bagiranye ibimenyetso byimbitse byerekana ko kwerekana iyi filimi hakaba n’ibiganiro nyuma yayo biyobowe na Paul Rusesabagina atari byo gushyigikirwa, haje gufatwa icyemezo na Burugumesitiri Véronique Caprasse cyo guhagarika iyi gahunda.

Muri make zimwe mu ngingo zerekana impamvu iyi filimi amashyirahamwe Ibuka-Mémoire & Justice asbl, Collectif des Parties Civiles asbl na Mpore asbl yasabye ko itakwerekanwa zigira ziti:

“Twebwe abarokotse Jenoside yakorewe Abatutsi n’abanyamuryango b’Umuryango-Nyarwanda mu Bubiligi (Communaute Rwandaise de Belgique) twasinye kuri uru rwandiko rusaba ihagarikwa ry’iki gikorwa, twemera rwose ko mufite uburenganzira bwo gutumira no kuganira n’uwo mushatse ku bikorwa ibyo aribyo byose mwahisemo, ariko kandi gutumira umuntu nka Paul Rusesabagina, upfobya jenoside yakorewe Abatutsi, tubasabye twivuye inyuma gufata icyemezo cyo kutamuha umwanya muri iki gikorwa muri komine yanyu.”

Aya mashyirahame akomeza agira ati: “Byaragaragaye henshi mu biganiro yagiye agirira kuri iyi filmi ko uyu Paul Rusesebagina anengwa mubyo avuga akoresheje iyi filimi yiyita intwari mu biyigaragaramo, nimushaka kumenya ukuri muzasome igitabo cyiswe ‘Hotel Rwanda ou le Génocide des Tutsi vu par Hollywood’ cyanditswe na Alfred Ndahiro & Private Rutazibwa mu mwaka wa 2008, cyasohotse muri "Edition l’Hurmattan" iki gitabo muzagisangamo ubuhamya nyabwo bw’abarokotse Jenoside yakorewe Abatutsi bari muri Hotel des Mille Collines icyo gihe, cyangwa mukaba mwasoma inyandiko ya Ndolimana Miheto wari Perezida wa Komite y’akanama k’impunzi zari muri Hotel des 1000 Collines muri Jenoside yakorewe Abatutsi, kuri uyu murongo: Miheto interpelle le « héro » politicien du Film Hôtel Rwanda

Mushobora kandi gusoma igitabo cya Edourd Kayinamura cyitwa "Inside the hotel Rwanda, the surprising true story... and why it matters today" ibi bitabo n’inyandiko bizabereka uwo Paul Rusesabagina ariwe nyabyo muri iyi filImi yiyitirira kuba intwari.

Nyuma y’iri saba ryo guhagarika iki gikorwa, Komine Kraainem yemeye guhagarika koko iyi filimi n’ibiganiro, ibitangaza no kuri site-web yayo ku mugaragaro, aho ubutumwa bwagiraga buti: "Tubabajwe no kubamenyesha ko habayeho ihagarikwa ryo kwerekana film "Hotel Rwanda"yagombaga kwerekanwa tariki ya 2 Ukuboza2014, abari biyandikishije bose kuzaza kuyireba bazabibamenyesha buri muntu ku giti cye byumwihariko."

karirima @igihe.com