Kuri uyu wa mbere nibwo hateganyijwe inama y’abaterankunga mu gushaka aya mafaranga akenewe vuba cyane, mu gihe Umunyamabanga Mukuru w’Umuryango w’Abibumbye, Antonio Guterres, atangaza ko Umuryango ayoboye ufite ibibazo by’amafaranga make ku buryo utagifite ubushobozi bwo guhemba abakozi bawo.

Abaturage barenga miliyoni 18, hafi kimwe cya kabiri cy’abatuye Afghanistan, bari basanzwe batunzwe n’inkunga z’amahanga, icyakora nyuma y’uko ibihugu byinshi bivanye ingabo muri icyo gihugu, bikanahagarika inkunga byatangaga, birakekwa ko abaturage bakeneye inkunga bashobora kwiyongera, dore ko 70% by’abaturage ba Afghanistan ari abakene.

Ni mu gihe kandi iki gihugu cyagize ibyago by’umusaruro w’ubuhinzi, ku buryo byose bishobora kurushaho gushyira ubuzima bw’abaturage mu kangaratete.

Leta ya Afghanistan yari isanzwe ikoresha 70% by'inkunga z'amahanga mu ngengo y'imari yayo, mu gihe hafi 40% by'amavuriro ari mu gihugu yaterwaga inkunga n'ibihugu by'amahanga, ku buryo mu gihe byose byahagarikwa, byagira ingaruka zikomeye ku baturage b'icyo gihugu.