Abayobozi bavuze ko ibisasu byaguye mu gace gatuwemo, byangiza inyubako z’amacumbi. Guverineri w’ako karere, Oleh Syniehubov, abinyujije kuri Telegram ko ibisasu bitatu byibasiye ahantu hatandukanye muri uwo mujyi.

Yavuze ko mu bantu 53 bakomeretse, 30 barimo kuvurirwa mu bitaro, naho batatu bakaba barembye. Mu bakomeretse harimo n’abana batatu.

Umuyobozi w’Umujyi wa Kharkiv, Ihor Terehov, yavuze ko abakozi bashinzwe ubutabazi bavanye imirambo ibiri mu bisigazwa by’inyubako zasenyutse.

Ibice by’imbere by’inyubako n’amabaraza yabyo byangiritse cyane, ndetse n’amacumbi yari imbere muri izo nyubako arasenyuka. Abatabazi bafashije abaturage bari bagifite ubwoba gusohoka, babayobora bitonze kugira ngo banyure hagati y’ibirundo by’ibisigazwa by’inyubako.

Viktoria Nahornyak, umwe mu baturage bahuye n’icyo gitero, yabwiye Reuters ko yabonye abaturanyi babiri bakomeretse, bavirirana amaraso. Yavuze ko umukobwa we yasohotse hanze, naho injangwe yabo igahunga.

Yasobanuye ko yafashe ibyangombwa bye, agasohoka yambaye imyenda yari asanganywe. Yabivuze mu gihe humvikanaga impuruza iburira abaturage ko hari ibitero byo mu kirere.

Umwe mu baturage yasanzwe yapfiriye mu buriri bwe. Undi murambo wari urambaraye hasi, utwikiriwe n’uburingiti. Ibi byagaragazaga ingaruka z’ibitero ku bantu bari mu gace gatuwe kibasiwe n’ibisasu.

Abayobozi batangaje ko ububiko bw’ibicuruzwa bwangijwe muri ibyo bitero. Amafoto aherekeza inkuru agaragaza abakora ibikorwa by’ubutabazi batwaye umurambo w’umuntu wakuwe munsi y’ibisigazwa by’uruganda rukora imyenda rwari rwibasiwe n’igitero cyo mu kirere.

Kharkiv ni umujyi wa kabiri munini muri Ukraine. Uherereye ku ntera y’ibilometero 30 uvuye ku mupaka w’u Burusiya.

Kuva intambara yatangira muri Gashyantare 2022, uwo mujyi wakomeje kwibasirwa n’ibitero by’u Burusiya, byawusenye cyane. Muri iki gitero, amakuru yatanzwe n’abayobozi agaragaza ko abantu bahasize ubuzima, abandi bagakomereka, mu gihe inyubako z’amacumbi n’ububiko byangiritse.

Inyubako zituwemo ziri mu ziri kugabwaho ibitero cyane

Abantu batanu ni bo baguye mu bitero by'u Burusiya