Ikimenyetso gishya mu iperereza ku Munyarwanda wiciwe mu Budage mu kwezi gushize cyerekanye ko batatu bakekwaho kumwica nta kindi bamuzizaga uretse ivanguraruhu.

Uyu nyakwigendera utaravugwa amazina, yatewe n’abagabo batatu baramukomeretsa bikabije biza kumuviramo urupfu.

The New Times kivuga ko abakora iperereza bavumbuye telefoni irimo ifoto y’abanazi (Nazi) y’umwe mu bacyekwa bituma bakeka ko ingengabitekerezo ye yaba iri mu byatumye bahohotera uwo Munyarwanda.

Abanazi bari abarwanashyaka bari bayobowe na Adolf Hitler mu kinyejana cya 20. Bari bafite ingengabitekerezo iheza bamwe barimo Abayahudi byaje kuviramo gukorerwa Jenoside.

Babiri mu bakekwaho ubwo bugizi bwa nabi bivugwa ko babanaga na nyakwigendera. Bose nta cumbi bagiraga babaga mu nzu yishyurwaga na leta y’u Budage.

Umuvugizi w’ubushinjacyaha bw’akarere ka Limburger yabwiye ibitangazamakuru byo mu Budage ko iyo foto basanze muri telefoni ishobora kuba yaramanuwe ku munsi ubwicanyi bwakoreweho.

Uwo Munyarwanda w’imyaka 53 yishwe ku ya 23 Ukwakira. Abayobozi bo mu Budage bavuga ko atari impunzi.

Abagenzacyaha bavuga ko batatu bakekwaho kumwivugana babasanze mo imyumvire y’ivangura.

Umujyi wa Limburg Umunyarwanda yiciwemo

Umurambo we wasanzwe mu cyumba cy’imwe mu nzu z’umugi wa Limburg. Abayobozi b’aho bahise bategeka ko hakorwa iperereza ku cyamwishe.

Inyandiko za Polisi y’u Budage zigaragaza ko yari afite ibikomere mu mutwe bahita banzura ko yazize ubugizi bwa nabi.

Iperereza ryerekanye ko habaye intonganya hagati y’uwo Munyarwanda w’imyaka 55 abandi babiri babanaga n’umwe mu baturanyi zikavukamo imirwano.

Mu itangazo polisi igira iti” Uwo mugabo yari yakomeretse mu mutwe no ku isura. Gusa ntibiramenyekana neza niba ibyo bikomere ari byo byamuhitanye”

Abakekwaho kumwica bategereje kuburanishwa.