Imbuga za AlphaBay na Hansa zakorerwagaho ubucuruzi butemewe bw’ibintu bitandukanye birimo imiti, ibiyobyabwenge, intwaro, virusi zangiza mudasobwa ndetse n’amakuru aba yibwe.

Polisi y’Umuryango w’Ubumwe bw’u Burayi (Europol) igaragaza kuri AlphaBay habarizwagaho ibicuruzwa bigera ku bihumbi 250 birimo ibiyobyabwenge n’ibindi binyabutabire.

Umuyobozi mukuru wa Europol, Rob Wainwright yavuze ko iyi ari intangiriro y’iperereza ku bacuruzi b’ibiyobyabwenge bakomeye ku isi, ndetse n’abandi banyabyaha bamaze kuyogoza isi muri iki gihe bitwikiriye ikoranabuhanga.

Umuyobozi w’agateganyo w’Ibiro bya Amerika bishinzwe iperereza (FBI), Andrew McCabe we yavuze ko gufunga AlphaBay na Hansa ari intambwe ikomeye itewe n’inzego z’umutekano.

Nk’uko BBC yabitangaje ngo izi mbuga zombi zafunzwe nyuma y’igihe kigera ku kwezi zidakora. AlphaBay yafunzwe muri Nyakanga, nyuma y’ukwezi Hansa ifunzwe.

Intumwa nkuru ya leta ya Amerika, Jeff Sessions yavuze ko kubera izi mbuga abatari bake bagiye bapfa imburagihe muri aba hakaba harimo umukobwa w’imyaka 18 wapfuye muri Gashyantare nyuma yo kunywa ibiyobyabwenge byinshi yari yaguze kuri AlphaBay ndetse n’undi muhungu w’imyaka 13.

Minisiteri y’Umutekano muri Amerika yatangaje ko mu biyobyabwenge byacurujwe kuri AlphaBay harimo Heroine, mu gihe amafaranga yacurujwe agera kuri miliyoni 450 z’amadolari kuva muri Gicurasi 2015 kugeza muri Gashyantare 2017.

Polisi kandi yataye muri yombi Alexandre Cazes w’imyaka 26 wari mu bayoboraga uru rubuga, nubwo nyuma yaje gusangwa muri gereza yo muri Thailande aho yari afungiwe yapfuye bigakekwa ko yiyahuye.

Hanafashwe ibikoresho bitandukanye birimo mudasobwa n’imodoka eshatu zo mu bwoko bwa Lamborghini.

Izi mbuga zifunzwe nyuma y’uko mu 2013 FBI ifunzwe Silk Road ndetse no mu 2014 igafunga Silk Road 2.0 yari yafunguwe ngo isimbure iyari yarafunzwe.

[email protected]