BBC itangaza ko ubwiyongere bw’impfu z’abana bazira Covid-19, buri guterwa ahanini ni uko muri rusange igihugu cyose cyibasiwe ndetse Werurwe yarangiye abantu barenga ibihumbi 36 bishwe na Coronavirus.

Ubu bwiyongere bw’abandura n’abicwa n’iki cyorezo, buri guterwa n’uko mu majyaruguru y’iki gihugu hagaragaye Coronavirus yihinduranyije ifite ubushobozi bwo kwandura cyane kuruta iyari isanzwe iriho kandi igenda isakara mu gihugu hose.

Inzobere mu buvuzi akaba n’Umushakashatsi muri Kaminuza ya São Paolo muri Brésil, Dr Fatima Marinho, mu bushakashatsi yakoze yagaragaje ko hari umubare munini w’impinja n’abana bafashwe na Covid-19, bihabanye n’ibyari byatangajwe mbere by’uko itajya ibafata.

Hagati y’Ukwakira 2020 na 15 Werurwe 2021, imibare ya Ministeri y’Ubuzima muri Brésil yagaragaje ko abana 852 bari munsi y’imyaka icyenda bishwe na Covid-19, muri bo 518 bari munsi y’umwaka umwe.

Dr. Marinho, avuga ko abapfuye bakubye kabiri iyi mibare yatangajwe na Minisiteri. Yatangaje ko abana bari munsi y’imyaka icyenda bishwe n’iyi virus ari 2.060 harimo impinja 1302.

Impamvu nyamukuru yabiteye Dr. Marinho avuga ko ari ukubera ko abana badapimwa Covid-19 ndetse bakajyanwa kwa muganga bamaze kuremba, bigatuma benshi bahitanwa n’iki cyorezo.

Ati “Dufite ikibazo gikomeye mu kumenya abanduye. Ntabwo dufite ibikoresho bihagije byo gupima abantu, byagera ku bana ho bikaba bike cyane. Kubera ko dutinda kumenya abanduye, bituma n’abana tubitaho igihe cyarenze.”

Akomeza avuga ko ikindi kibazo ari uko ibimenyetso bya Covid-19 mu bana bitandukanye n’ibigaragara ku bantu bakuru bityo bigakomeza kuba ingorabahizi mu kumenya uyanduye hakiri kare.

Ati “Umwana aba ahitwa cyane, ababara cyane mu ngingo no mu gatuza, kuruta ibisanzwe bizwi kuri Covid-19. Kubera ko habaho ubukererwe mu kuvuza abana, iyo umubyeyi amuzanye kwa muganga yamaze kuremba, indwara iba yongereye ubukana ndetse ikaba yanamuhitana.”

Ikindi kibazo kiri guteza impfu z’abana cyagaragajwe n’iyi nzobere ni ubukene, aho abana bahitanwa na Covid-19 cyane ari abirabura kuko baba mu miryango ituye mu duce tw’akajagari muri Brésil, kandi bagahura n’ikibazo cy’imirire mibi ituma imibiri yabo itabasha kwihagararaho mu gihe yinjiwe n’iyi ndwara.

Umuti w’ingenzi kuri iki kibazo wagaragajwe n’umushakashatsi wo muri Kaminuza ya São Paolo, Braian Sousa, ni uko abana bakingirwa, gusa kugeza ubu nta rukingo rwa Covid-19 ruraboneka ku bana bari munsi y’imyaka 16.

Ababyeyi bafite abana barembye kubera Covid 19 muri Brésil ntibemerewe kugera aho bari hakoreshwa telefoni ngo barebe uko bameze

Abana bandura Covid-19 n'abicwa na yo muri Brésil bakomeje kwiyongera

Umuganga ari kwereka ababyeyi uko umwana wabo ameze mu bitaro

Umuryango w'umwana wahitanywe na Covid-19 afite umwaka umwe gusa

Amafoto: BBC