Iyi myigaragambyo itangiye nyuma y’uko igihe ntarengwa cyo kugera ku masezerano hagati y’Ishyirahamwe ry’Abakozi na Air Canada kirangiye nta kiragerwaho.

Umuvugizi w’Ishyirahamwe ry’Abakozi ba Leta ya Canada (Canadian Union of Public Employees, CUPE), Hugh Pouliot, yemeje ko imyigaragambyo yatangiye nyuma y’uko nta masezerano agezweho ku bijyanye n’ibibazo by’imishahara, maze Air Canada na yo ihita itangaza ko ihagaritse ibikorwa byayo.

Intambara ikomeye y’amasezerano hagati ya sosiyete y’indege ya Air Canada n’Ishyirahamwe rihagarariye abakozi bayo bagera ku bihumbi 10 yarushijeho gukara ku wa Gatanu, ubwo CUPE yangaga ubusabe bw’iyi sosiyete y’indege bwo kwinjira mu nzira y’ubuhuza.

Mu ijoro ryo ku wa Gatanu, Minisitiri w’Umurimo muri Canada, Patty Hajdu, yari yahuye n’ubuyobozi bw’iyi sosiyete y’indege n’Ishyirahamwe ry’Abakozi, abasaba gukora uko bashoboye kugira ngo bagere ku masezerano burundu kandi bidasubirwaho.

Mu itangazo yashyize ku mbuga nkoranyambaga, yagize ati “Birakabije kandi ntibikwiye kubona intambwe yatewe ari nto cyane. Abanya-Canada bategereje ko impande zombi zishyira imbaraga zazo zose mu gushaka umuti.”

Umuvugizi w’Ishyirahamwe ry’Abakozi muri Air Canada, Pouliot, yari yatangaje ko iryo shyirahamwe ryahuye na Hajdu hamwe n’intumwa za Air Canada agira ati “CUPE yaganiriye n’umuhuza igaragaza ubushake bwo gukomeza ibiganiro n’ubwo Air Canada itigeze igira icyo ivuga ku byifuzo byacu bibiri biheruka kuva ku wa Kabiri, turi hano ngo tuganire ku masezerano, ntabwo ari ukugira ngo twigaragambye.”

Ihagarikwa ry’ibikorwa byose by’iyi sosiyete rizagira ingaruka ku bantu bagera ku 130.000 ku munsi, kandi Abanya-Canada bagera ku 25.000 bashobora kuguma mu mahanga.

Umuyobozi Mukuru ushinzwe Imikorere muri Air Canada, Mark Nasr, yavuze ko bishobora gufata icyumweru cyose kugira ngo ibikorwa bisubukurwe neza nyuma yo kugera ku masezerano y’agateganyo.

Air Canada yatangaje kandi ko abagenzi bari barishyuye ingendo zabo, bazasubizwa amafaranga yose binyuze ku rubuga rwa Air Canada cyangwa kuri yindi porogaramu yayo ya telefoni.

Imyigaragambyo y'abakozi yatumye Air Canada ihagarika ingendo