Mu rwego rwo gukangurira abakobwa kwirinda ubusambanyi, abashinzwe uburezi mu gihugu cya Indonesia, basabye inteko ishinga amategeko kwiga ku munshinga w’itegeko ryemeza ko abakobwa bazajya bapimwa ubusugi, mbere yo guhabwa impamyabumenyi. Iki cyifuzo ariko ntikivugwaho rumwe, imiryango iharanira Uburenganzira bwa Muntu yacyamaganiye kure

Inkuru dukesha The Jakarta Post ivuga ko Muhammad Rasyid ushinzwe uburezi mu karere ka Prabumulih mu majyepfo y’Umujyi wa Sumatra, yatangaje ko iri tegeko riramutse ritowe n’inteko ishinga amategeko, ryafasha mu kurinda abana b’abakobwa bo muri Indonesia kwishora mu ngeso mbi ziganisha ku busambanyi. Asaba ko umukobwa wazajya arangiza amashuri yisumbuye, mbere yo guhabwa impamyabumenyi yabanza gupimwa, bakareba ko ari isugi.

Mu cyumweru gishize batanze umushinga mu nteko ishinga amategeko, basaba ko abakobwa bari mu kigero cy’imyaka 16 na 19 bajya bapimwa ko bakiri amasugi.

Muhammad Rasyid yagize ati “Ni inyungu zabo, kuko buri mugore afite uburenganzira bwo kuba isugi, itegeko niritorwa ubuyobozi bw’ishuri buzajya bupima umunyeshuri ibisubizo bihabwe ababyeyi be mu ibanga.”

Abatsimbaraye ku mahame ya politiki muri icyo gihugu hamwe n’abihaye Imana, bashyigikiye icyo cyemezo, ariko batewe impungenge n’uko abagize inteko ishinga amategeko bashobora kuzagitera utwatsi.

Imiryango irengera Uburenganzira bwa Muntu, ikaba yatangiye gusaba ko abadepite bataha agaciro uwo mushinga, kuko byabangamira Uburenganzira bwa Muntu. Bakomeza bavuga ko abakobwa baba barakoze imibonano mpuzabitsina mbere y’uko iryo tegeko ritorwa, baba bahohotewe kuko bakwimwa impamyabumenyi zabo.

Mu gihugu cya Indonesia hagati y’umwaka wa 2007 na 2012 umubare w’abakobwa bari hagati y’imyaka 15 na 19 batwaye inda zitateguwe wageraga kuri 37%.

[email protected]