U Bushinwa bwashyizeho uyu musoro mu cyumweru gishize, mu rwego rwo kwihimura kuri Perezida Trump na we wari wari washyiriyeho ibicuruzwa bituruka i Beijing undi musoro wa 34%.

Nk’uko bigaragara mu butumwa Trump yanyujije ku rubuga Truth Social, yasabye u Bushinwa gukuraho uyu musoro, bitaba ibyo na we agashyiraho undi wa 50% kuri uyu wa 8 Mata 2025.

Yagize ati “U Bushinwa nibudakuraho 34% yiyongera ku migirire mibi mu bukungu yaburanze igihe kirekire, tariki ya 8 Mata 2025, Amerika izabushyiriraho undi musoro wa 50% uzatangira gukurikizwa tariki ya 9 Mata.”

Minisiteri y’Ubucuruzi y’u Bushinwa yatangaje ko iki gihugu kizafata ingamba zihamye zo kurengera uburenganzira n’inyungu zacyo mu rwego rw’ubucuruzi.

Yagize iti “Ibikangisho bya Amerika byo kuzamurira u Bushinwa umusoro ni amakosa yayo kandi bigaragaza iterabwoba ryayo u Bushinwa butazemera. U Bushinwa buzarwana kugeza ku iherezo mu gihe Amerika yakomeza inzira y’ubuyobe.”

Urwego rwa Amerika rushinzwe ubucuruzi rugaragaza ko u Bushinwa bwohereje muri iki gihugu ibicuruzwa bifite agaciro ka miliyari 438,9 z’Amadolari ya Amerika mu 2024, byiyongereyeho 2,8% ugereranyije n’umwaka wabanje.