Iki gisasu cyarashwe ku butumburuke bwa kilometero 2,802, kikaba ari cyo cya mbere kigeze kure mu byo iki gihugu cyagerageje nk’uko byatangajwe na televiziyo yo muri Koreya ya Ruguru.

Ibiro Ntaramakuru bya Leta ya Koreya ya Ruguru( KCNA) byatangaje ko Perezida wayo yavuze ko kugerageza ari ikimenyetso cy’ubushobozi buhambaye mu gucura intwaro z’ubumara ziri ku rwego mpuzamahanga kuko ubu misile yakozwe ibasha kuba yarasa kuri buri gace kose kari ku Isi.

Leta Zunze Ubumwe za Amerika zemeje ko Koreya ya Ruguru yakoze igerageza ry’igisasu kirimbuzi kibasha gukora urugendo rurerure ku buryo abahanga bemeje ko cyazenguruka Isi.

Umunyamabanga wa Leta muri Leta Zunze Ubumwe za Amerika Rex Tillerson yise iryo gerageza rya Koreya ya Ruguru ubushotorany, atangaza ko Washington itazigera yemera ikoreshwa ry’intwaro kirimbuzi rya Koreya ya Ruguru.

Tillerson yagize ati “Hakenewe igikorwa mpuzamahanga mu guhagarika igitero mpuzamahanga. Igihugu gitanga ubushaka mu by’ubukungu cyangwa mu bya gisirikare kuri Koreya ya Ruguru kiba kinaniwe kubahiriza imyanzuro y’Ishami ry’Umuryango w’Abibumbye.”

BBC itangaza ko Leta Zunze Ubumwe za Amerika zahise zitumiza Inama y’Ishami ry’Umuryango w’Abibumbye rishinzwe umutekano (UN Security Council) kugira ngo haganirwe kuri icyo kibazo.

Leta Zunze Ubumwe za Amerika na Koreya y’Epfo na byo byarashe misile mu nyanja y’Abayapani mu rwego rwo kwereka Koreya ya Ruguru ko ziri maso.

Igisasu Koreya ya Ruguru yagerageje ngo kibasha kurasa agace ako ari ko kose ku Isi

Leta Zunze Ubumwe za Amerika na Koreya y'Epfo byateye igisasu mu nyanja y'Abayapani