Umuryango w’Abibumbye kandi watangaje ko mu kugaragaza ko udashyigikiye ibyakozwe n’Abatalibani, wasabye abakozi bawo bakorera muri Afghanistan kutagera ku kazi.

Ubwo Abatalibani bafataga ubutegetsi mu 2021, bashyizeho amabwiriza akakaye ashingiye ku mahame ya kisilamu harimo kubuza abagore kwiga mu mashuri ya Kaminuza cyangwa kwiga mu mashuri amwe n’abagabo.

Umunyamabanga Mukuru wa Loni, Antonio Guterres yasabye Leta y’Abatalibani kuvanaho iryo tegeko ribuza abagore gukorera imiryango mpuzamahanga.

Umuhuzabikorwa ushinzwe ubutabazi bw’amashami ya Loni muri Afghanistan, Ramiz Alakbarov yavuze ko ayo mategeko anyuranyije n’amahame umuryango w’Abibumbye ugenderaho.

Ati “Birazwi ko ntawe ukwiriye guha amabwiriza Loni y’uwo igomba guha akazi n’uwo itagaha. Ntabwo aha rero ari ho tuzabirengaho.”

Umuyobozi w’Ishami rya Loni muri Afghanistan, Roza Otunbayeva yavuze ko nta bundi butegetsi ku Isi bigeze babona bubuza abagore gukorana na Loni.

Umunyamabanga Mukuru wungirije wa Loni, Amina Mohammed yatangaje ko abagore bakorera ishami ry’uwo Muryango muri Afghanistan bazakomeza guhembwa.

Mu bakozi basaga 600 bakorera Loni muri Afghanistan, abasaga 400 ni abagore.

Abagore bo muri Afghanistan bari bamaze igihe basabwa kwambara bikwije igihe bari mu ruhame