Umuryango w’Ubumwe bw’Ibihugu by’u Burayi umaze kwiyemeza guha Mali amafaranga angana na miliyari ebyiri z’Amayero mu gufasha icyo gihugu kwisana, mu nama ibera i Buruseli, mu Bubiligi.

BBC yanditse ko Abakuru b’ibihugu bitandukanye bateraniye mu nama kuri uyu wa Gatatu yitiriwe "Ihuriro rya Mali nshya". Ikaba ifite intego yo gushakisha amafaranga angana na miliyari ebyiri z’Amayero yo gutera inkunga icyo gihugu.

Abahagarariye Umuryango w’Abibumbye, Banki y’Isi, Ubumwe bw’Afurika, Ubumwe bw’Ibihugu by’i Burayi, abakuru b’ibihugu François Hollande (France), Blaise Compaoré (Burkina Faso), Faure Gnassingbé (Togo), Alassane Ouattara (Côte d’Ivoire), Mahamadou Issoufou (Niger), Mohamed Ould Abdelaziz (Mauritanie) n’abandi nibo bateraniye muri iyi nama.

Umukuru w’Umuryango w’Ubumwe bw’Ibihugu by’i Burayi, Jose Manuel Barroso yavuze ko ayo mafaranaga azafasha icyo gihugu cyo muri Africa y’i Burengerazuba kongera gutekana, ’’kugaruka mu nzira ya demokarasi hamwe no gutera imbere’’.

Iyo nama niyo ya mbere ibaye kuri Mali kuva u Bufaransa bwohereje muri Mutarama ingabo zabwo gufasha kurwanya abafashe intwaro, barwanya Leta ya Mali bitwaje idini rya Isilamu.

Leta ya Mali ifite umugambi wa miliyari 4.3 z’Amayero kugira izahure igihugu.

Izo ntego zirimo kongera kubaka inzego z’igihugu, gusana ibikorwa remezo byasenywe, gutegura amatora y’umukuru w’igihugu, gukorana ibiganiro n’inyeshamba zo mu Burasirazuba, hamwe no gushaka uburyo bwo guteza imbere ubukungu.

Umukuru w’igihugu w’inzibacyuho wa Mali Dioncounda Traore amaze kubonana n’umukuru w’urwego rw’ubutegetsi rw’Umuryango w’Ibihugu by’Ubumwe by’i Burayi, yavuze ko yizeye ko iyo nama y’abafasha Mali ishobora kuvamo miliyari ebyiri z’Amayero.

Umuryango w’abagiraneza Oxfam uvuga ko abatanga imfashanyo bakwiye kwiyemeza gufasha Mali mu gihe cy’imyaka 15, kugira ngo hakorwe ibintu birambye.

Oxfam igira iti ’’Ingorane zo mu bihugu nka Afuganistani cyangwa Somalia zerekanye ko gukora ibintu mu buryo bwa hafi nko gutsinda intambara ya gisirikare nta na rimwe byigera bituma haboneka amahoro n’umutekano birambye’’.