Goulard, wahoze ari Umudepite mu Nteko Ishinga Amategeko y’Umuryango w’Ubumwe bw’u Burayi, yavuze ko adashobora kuguma muri guverinoma mu gihe hari amahirwe menshi yo kuzakurwaho iperereza ku bijyanye n’isesagura ryavuzwe muri iyi nteko.

Mu itangazo yashyize ahagaragara, yagize ati “mu gihe iperereza ry’ibanze rizaba rigendereye kugaragaza uburyo hari abari banyungirije bahawe akazi mu Nteko Ishinga Amategeko y’Umuryango w’Ubumwe bw’u Burayi, ndifuza kugaragaza nemye ubushake bwanjye n’akazi nakoze hariya.”

Goulard yari amaze ukwezi kumwe ari Minisitiri w’Ingabo nyuma yaho Macron atorewe kuba Umukuru w’Igihugu. Gusa yavuze ko ikorwa ry’iri perereza ryagombaga gutuma kuguma ku mwanya we bimugora bijyanye na politiki ya Macron ushaka kugarura umucyo mu mikorere y’inzego z’igihugu cye.

Mu ntangiriro z’uyu mwaka, Ubushinjacyaha bw’i Paris bwari bwatangije iperereza ry’ibanze kuri iki kibazo aho ishyaka rya MoDem rishinjwa kuba ryarakoresheje inkunga igenewe Inteko Ishinga Amategeko y’Umuryango w’Ubumwe bw’u Burayi mu guhemba abakozi bari mu Bufaransa.

Uwari Minisitiri w’Ingabo mu Bufaransa, Sylvie Goulard, yeguye ku mirimo ye