Leta ya Misiri yarekuye umunyamakuru Peter Greste, wari umaze iminsi 400 afungiye gukurikiranwaho gukorana n’ishyaka rya Muslim Brotherhood rya Mohamed Morsi wahoze ayoboye Misiri.

BBC yatangaje ko Peter Greste, yahoze ari umunyamakuru wa BBC, ubu akaba yakoreraga Aljazeera yoherejwe mu gihugu cya Cyprus ubu akaba ategereje kujya mu gihugu akomokamo cya Australia.

Aljazeera uyu munyamakuru yakoreraga yashimye iki gikorwa ariko inasaba ko na bagenzi be babiri bari bafunganywe nabo bafungurwa.

Abanyamakuru ba Aljazeera muri gereza

Kugeza ubu abagifunze ni Baher Mohamed na Mohamed. Fahmy ufite ubwenegihugu bwo muri Canada, azoherezwayo kuko ubundi asanganywe bwa Misiri buzaba bwamaze gutesha agaciro nkuko amakuru yavuye muri Perezidansi ya Misiri abyemeza.

Aba banyamakuru bari barakatiwe igifungo cy’imyaka 7 bahamijwe ibyaha byo gutangaza amakuru y’ibinyoma. Tariki ya 1 Mutarama 2015 bari bemerewe gusubirishamo urubanza n’urukiko rusesa imanza rwa Misiri.

Peter Greste akomoka muri Australiya, akaba yaranakoreye BBC. Mohammed Fahmy afite ubwenegihugu bwo muri Canada na Misiri naho Baher Mohammed ni Umunyamisiri.

Bari bahamijwe icyaha cyo gushyigikira ishyaka ryahagaritswe n’amategeko rya Muslim Brotherhood, bafashwe mu myigaragambyo ikomeye yakozwe n’abo muri iryo shyaka bashyigikiye uwahoze ari Perezida wa Misiri Morsi ugifunze kugeza ubu.

Al-Jazeera yari yanenze icyo cyemezo cy’urukiko, ivuga ko kirenze urugero kandi ko kibogamye.

Ministiri w’ububanyi n’amahanga wa Australiya, Julie Bishop, yari yatangaje ko yababajwe n’ibyo bihano, yongeraho ko afite impungenge z’uko bishobora kuba biri mu mugambi mugari wa Misiri ugamije guhagarika uburenganzira bw’itangazamakuru.

[email protected]