Uwahoze ari guverineri w’intara ya Florida, Jeb Bush yatangaje ku wa kabiri ko agiye gutangiza ikusanya ry’amafaranga yazifashisha mu aramutse yiyamamarije kuyobora Leta Zunze Ubumwe za Amerika mu 2016.

Jeb Bush ni murumuna w’uwahoze ayoboye USA, George W. Bush wayoboye USA hagati ya 2001-2009 akaba n’umuhungu wa George H. W. Bush wayoboye (1989-1993).

Televiziyo France 24 ivuga ko mu butumwa yanyujije ku mbuga nkoranyambaga za Facebook na Twitter yavuze ko yaganiriye ku hazaza h’igihugu cye n’abo mu muryango we, bagasanga nawe akwiye kwiyamamariza kuyobora USA.

Ati” Nyuma yo kuganira ku buyobozi nyabwo Amerika ikeneye, nafashe umwanzuro ko nkwiye kwiyamamariza kuba Perezida wa USA”

Bush yakomeje avuga ko ateganya gushinga komite y’ibikorwa bya politiki igamije kuganira ku bibazo byugarije USA, mu ntangiriro z’umwaka utaha.”

Ati “ Muri Mutarama ndateganya gushinga komite izamfasha kuganira n’abaturage ku bibazo byugarije igihugu, tugashyigikira ibitekerezo na gahunda zaganisha Abanyamerika ku iterambere.”

Abasesengura politiki bemeza ko ishyaka ry’Abarepubulika rishobora kwemera gutanga Jeb Bush nk’umukandida kuko afite abamushigikiye benshi mu bavuga ururimi rw’Icyesipanyole (Spanish).

Kuba umugore we yaravukiye muri Mexico kandi avuga urwo rurimi biri mu byamufashije gutsindira kuba guverineri wa Leta ya Florida mu 1998.

Jeb Bush ntashyigikiye ko abimukira bahabwa ubwenegihugu busesuye, kimwe n’ishyaka rye ry’Abarepubulika, bitambitse Perezida Obama mu guha abimukira miliyoni eshanu, impapuro zibemerera gutura muri USA.

Ishyaka ry’abademukarate rihanganye n’iry’Abarepubulika ntiriratangaza uzarihagararira ariko benshi baha amahirwe Hillary Clinton umugore w’uwahoze ari Perezida, Bill Clinton.