Vučić azahagararira ishyaka Serbian Progressive Party (SNS). Yari yaratangaje ko azava ku mwanya wa Perezida kugira ngo abashe guhatanira kuyobora Guverinoma, mu gihe ishyaka rye ryatsinda amatora.

Manda ye ya kabiri yari kuzarangira muri Gicurasi 2027. Itegeko Nshinga rya Serbia ntirimwemerera kwiyamamariza manda ya gatatu ku mwanya wa Perezida.

Mbere yo kwegura, Vučić yasezeye ku bamushyigikiye bari bateraniye imbere y’ibiro bye mu murwa mukuru Belgrade. Yavuze ko yishimira ibyo bagezeho mu gihe yari ayoboye igihugu.

Amatora y’abadepite yateguwe mbere y’igihe nyuma y’igihe yari amaze asabwa n’abanyeshuri bayoboye imyigaragambyo muri Serbia. Yatangiye nyuma y’impanuka yabereye kuri sitasiyo ya gari ya moshi yo mu Mujyi wa Novi Sad mu Ugushyingo 2024, igahitana abantu 16.

Abigaragambyaga babanje gusaba ko iyo mpanuka ikorwaho iperereza rinyuze mu mucyo, nyuma basaba ko habaho amatora y’abadepite mbere y’igihe cyari giteganyijwe. Vučić yatangaje ko ayo matora azaba ku wa 25 Ukwakira 2026.

Ana Brnabić, wari Perezida w’Inteko Ishinga Amategeko, agiye kuyobora Serbia by’agateganyo kugeza hatowe undi Perezida. Amatora yo kumusimbura agomba kuba mu gihe kitarenze iminsi 90.

Mu matora y’abadepite, ishyaka rya Vučić n’abo bafatanyije bazahangana n’imitwe itavuga rumwe na bo, irimo iy’abanyeshuri baharanira kurwanya ruswa n’ihuriro ry’amashyaka ashyigikiye ko Serbia irushaho kwegera u Burayi.

Perezida wa Serbia yeguye