Perezida mushya w’igihugu cya Venezuella, Nicolas Maduro, ku wa gatandatu tariki ya 04 Gicurasi yise Barack Obama, Perezida wa Leta zunze ubumwe za Amerika ko ari umuyobozi mukuru w’amashitani.

Ibi Maduro yabivuze nyuma y’uko Obama na we yari yatangarije kuri televiziyo y’abanyamerika “Univision”, ko atemera intsinzi Maduro aheruka kwegukana mu matora yo ku itariki 14 Mata, nyuma y’urupfu rwa Hugo Chavez wayoboraga Venezuela.

Maduro na we ntiyihanganye ngo aripfane, ashinja Obama gutera inkunga abadashyigikiye ubutegetsi ndetse na bamwe mu badipolomate b’abanyamerika gushaka guhitana ubuzima bwe. Ibi bose bakomeje guhakana bivuye inyuma.
Mu ijambo yavuze mu ruhame, yagize ati “Turabungabunga inzego z’ubutegetsi, amahoro, Demokarasi, n’abaturage ba Venezuela. Dushobora kwicarana na buri wese dushaka ushyizemo n’umukuru w’amashitani Obama.”

Nk’uko Wall Street Journal dukesha iyi nkuru ibitangaza, uyu muyobozi w’igihugu gikize cyane kuri petelori yatsinze amatora ku itandukaniro rito cyane hagati ye n’uwo bari bahangaye, Henrique Capriles, nyamara Leta zunze ubumwe za Amerika zirahamagarira kongera kubarura amajwi kuko ivuga ko habayeho ubujura mu kubara.

Maduro ku wa gatandatu yatangaje ko yari yizeye ko igihugu cye na Amerika bazagirana ibiganiro, nyamara kugeza ubu aragenda atakaza icyizere. Yagize ati “Birabaje cyane kubona ukuntu Obama ageze aho gushingira ku makuru yuzuye amarangamutima akesha minisiteri ye y’ingabo, ndetse n’ibiro by’ubutasi bya CIA. Birababaje kuko ubwo Perezida Obama yatsinadaga amatora, hari icyizere cy’ibyiza mu bihugu bya Amerika y’Amajyepfo. Ubu cyarayoyotse.”

Minisiteri y’ububanyi n’amahanga ya Venezuela na yo yashinje Amerika kuba ifite umugambi wo guteza imyivumbagatanyo muri Venezuela, mu rwego rwo gushaka urwitwazo rwo gutera igihugu cyabo nk’uko ijya ibikora n’ahandi hose itera.

Izi ntonganya hagati ya Amerika na Venezuela, zikaba zije kongera umwuka mubi no kutizerana mu minsi ya mbere y’ubuyobozi bwa Maduro, ndetse bishobora no kugira ingaruka kuri politiki ya Venezuela n’imibanire yayo na Amerika isanzwe itifashe neza hagati y’ibihugu byombi.

Mbere ya Maduro, ibintu ntibyari bisanzwe byifashe neza hagati y’uwo yasimbuye Hugo Chavez uheruka guhitanwa n’indwara ya kanseri, akaba yaraboye Venezuela imyaka 14, atabanye neza na Leta zunze ubumwe za Amerika yashinjaga gushaka guhirika ubutegetsi bwe.

Nicolas Maduro, Perezida wa Venezuela