Xi Jinping yegukanye iyi manda mu matora yabaye kuri uyu wa Gatanu tariki 10 Werurwe, yagizwemo uruhare n’abagize Inteko Ishinga Amategeko ndetse n’Urwego ngishwanama muri iki gihugu.

Perezida Jinping yegukanye uyu mwanya w’Umukuru w’Igihugu nyuma y’uko n’ubundi mu mpera z’umwaka ushize yari yongeye kwemezwa nk’Umuyobozi w’ishyaka ry’Aba-Communiste riri ku butegetsi mu Bushinwa.

Biteganyijwe ko nyuma yo gutorwa, ku wa Mbere tariki 13 Werurwe mu 2023 Perezida Xi Jinping azageza ijambo ku bagize Inteko Ishinga Amategeko ari naryo rizasoza umwiherero bamaze iminsi ugamije guha icyerekezo u Bushinwa mu myaka itanu iri imbere.

Uyu mwiherero uzwi nka “Two Sessions” ari nawo wabereyemo amatora y’Umukuru w’Igihugu mu Bushinwa uba ugamije gushyiraho abagize guverinoma no gutanga umurongo bazagenderaho muri manda y’imyaka itanu.

Perezida Xi Jinping yegukanye manda ya gatatu nyuma y’uko mu 2018 abagize Inteko Ishinga Amategeko mu Bushinwa bateranye bakemeza guhindura ingingo y’Itegeko Nshinga yagenaga ko manda z’Umukuru w’Igihugu zitagomba kurenga ebyiri.

Uretse Perezida Xi Jinping watowe biteganyijwe ko kuri uyu wa Gatandatu aribwo hazemezwa Minisitiri w’Intebe mushya mu Bushinwa, umwanya ushobora kwegukanwa na Li Qiang usanzwe ari Umunyamabanga w’Ishyaka ry’Aba-communist muri Shanghai.

Biteganyijwe kandi ko hazashyirwaho Minisitiri w’Ubucuruzi, Uw’Umutekano n’abandi.

Xi Jinping w’imyaka 70 yatorewe bwa mbere kuyobora u Bushinwa mu 2013. Ni umwe mu bayobozi bakomeye u Bushinwa bugize nyuma ya Mao Zedong wagejeje igihugu ku bwigenge.

Ashimirwa uburyo yafashije igihugu kugaragara muri politiki mpuzamahanga mu bijyanye n’ubukungu nk’aho kiza ku mwanya wa kabiri mu bihugu bikize ku isi, ndetse intego ikaba ari uko mu myaka umunani iri imbere kizaba kiri ku mwanya wa mbere.

Ni ibintu impuguke n’abasesenguzi bemeza ko bishoboka cyane ukurikije umuvuduko w’ubukungu bw’u Bushinwa, mu gihe hirya no hino ku isi ubukungu bwaguye kubera Covid-19 n’intambara, ariko u Bushinwa bugakomeza guhagarara bwemye.

Ku ngoma ya Xi kandi, u Bushinwa bwakomeje kugira igitinyiro mu maso y’ibihugu by’amahanga nka Leta Zunze Ubumwe za Amerika n’u Burayi.