Mu gihe habura iminsi 20 ngo hiyambazwe ibitero mu kwambura intwaro umutwe wa FDLR, abawanyi 156 ni bo bonyine bamaze gushyira intwaro hasi, ndetse ni bo bari kumwe n’imiryango ya bo mu nkambi ya Kisangani irimo abantu 641.

Inkuru ya RNA, ivuga ko mu kiganiro agirana n’abanyamakuru buri cyumweru, Charles Antoine Bambara Umuvugizi w’ingabo z’umuryango w’Abibumbye zishinzwe kubungabunga amahoro muri Congo Kinshasa (MONUSCO) yatangaje ko kuwa 8 Ukuboza 2014, abantu 46 barimo 8 bahoze ari abarwanyi, bahagurutse i Goma berekeza i Kisangani.

Abo ni bo batumye imibare y’abari muri iyo nkambi ya Kisangani igera kuri 641, barimo abahoze ari abarwanyi ba FDLR 156, n’abandi 485 bagize imiryango yabo.

Mu minsi ishize bamwe mu bahoze ari abarwanyi mu mutwe wa FDLR batahutse, bumvikanye mu biganiro bitandukanye bavuga ko FDLR ijijisha amahanga ko ishyira intwaro hasi.

Kuva muri Gicurasi abarwanyi ba FDLR bavugwaho gushyira intwaro hasi ni 250 muri Kivu zombi.

Biteganyijwe ko tariki ya 2 Mutarama 2015, abazaba bakinangiye gushyira intwaro bazatangira kugabwaho ibitero, bakamburwa intwaro ku gahato.