Imyigaragambyo yamagana ihindurwa ry’Itegeko rigenga amatora yakomeje kuwa kabiri tariki ya 20 Mutarama 2015, yatumye Leta ya Congo Kinshasa ihagarika imirongo ya interineti ‘ubundi buryo bwose bwo kohererezanya ubutumwa bugufi (sms) kuri telefoni.

Nu Majyepfo ya Kinshasa, agahenge kabaye ak’igihe gito kuri uyu wa Kabiri, maze hakomeza imyigaragambyo, yanahitanye abantu bane barimo abapolisi 2, maze Leta ya Congo Kinshasa ihita itegeka ihagarikwa ry’itumanaho ryo kohererezanya ubutumwa bugufi (sms), kimwe n’imirongo ya interineti.

Nk’uko tubikesha Jeune Afrique, mu rukerera rwo kuwa Kabiri, umwe mu bakozi b’amasosiyete y’itumanaho yabwiye AFP ko ubutumwa bugufi (sms) na interineti byari byahagaritswe ku busabe bwa leta.

Byasanye imbaraga zidasanzwe kugirango Polisi n'igisirikare babashe gutatanya abigaragambyaga

Umutekano muke i Kinshasa wanatumye isosiyete y’indege ya “Air France” ifata icyemezo cyo guhagarika urugendo rwo kuwa Kabiri rwerekeza muri uwo murwa mukuru, ariko kuri uyu wa Gatatu irakomeza gukora.

Abigaragambya basahuye amazu y’ubucuruzi menshi
Iyi myigaragambyo Leta yatangaje ko kuwa Mbere yahitanye abantu bane (4), ariko abatavuga rumwe na yo batangaza ko hapfuye abagera kuri 13.

Umuyobozi w’Ubutumwa bwa Loni muri Congo (MONUSCO), Martin Kobler, yatangaje ko ababajwe n’abantu bishwe, abandi bagakomerekera muri iyo myigaragambyo, kimwe n’ingufu z’inzego z’abashinzwe umutekano zakoreshejwe mu gutatanya abigaragambya.

Abigarambya bamaganye ihindurwa ry’itegeko rigenga amatora, kuko Leta yagaragaje ko hagomba kubanza gukorwa ibarura rusange ry’abaturage bigatuma amatora y’Umukuru w’Igihugu yari kuzaba mu 2016 yigizwa inyuma akaba mu 2017.

Ibi bikabonwa nk’uburyo bwo gushaka kutarekura ubutegetsi kwa Perezida Joseph Kabila, kuko manda ye yagombaga kurangira mu 2016.

[email protected]