Mu ijambo rikomeye yavugiye imbere y’Inteko Ishinga Amategeko imitwe yombi, Perezida wa Repubulika Iharanira Demukarasi ya Congo (RDC), Joseph Kabila yihanangirije amahanga akomeje gushaka ko amatora yo mu bihugu bya Afurika agendera ku mabwiriza n’ugushaka kwabo.

Inkuru ya y’Ibiro Ntaramakuru by’Abafaransa (AFP), ivuga ko iri jambo yaritangaje kuri uyu wa mbere tariki ya 15 Ukuboza, yarivuze asa n’usubiza amaze iminsi amushyize ku gitutu ngo atazahinduza Itegeko Nshinga, akiyamamariza kuyobora Congo kuri manda ya gatatu, mu matora ateganijwe mu 2016.

Kabila yagize ati “Inama zabo, impanuro, ubufasha ndetse n’ibyifuzo byabo, twabyakira nta kibazo; ariko nta na rimwe tuzemera amabwiriza yabo”.

Kabila avuga ko atumva impamvu abantu batari abanyekongo bumva bagira uruhare mu biganiro n’imishyikirano ireba abanyekongo ubwabo, akibaza izo mpuhwe bafite, n’ubwo imigambi yabo yaba ari myiza.

Abasesenguzi bafata iri jambo nk’iribwira Perezida w’u Bufaransa, Francois Hollande, uherutse gukangurira abaperezida ba Afurika kubaha Itegeko Nshinga, hari mu nama y’Ibihugu bivuga igifaransa iherutse kubera i Dakar mu mpera z’Ugushyingo.

Abandi bavuga ko muri iri jambo, yabwiraga Umunyamabanga wa Leta Zunze Ubumwe za Amerika (USA) John Kerry, uherutse kwerura akamubwira ko ashaka kumubona yarekuye ubutegetsi mu 2016, byari mu nama yahuje USA n’abakuru b’ibihugu bya Afurika.

Joseph Kabange Kabila yagiye ku butegetsi mu 2001 asimbuye se Laurent Desire Kabila wari umaze kwicwa.

Mu 2006 na 2011, Kabila yariyamaje atsinda amatora, nubwo amashyaka atavuga rumwe na Leta ye , arangajwe imbere Etienne Tshisekedi, yavuze ko amatora yabayemo uburiganya.