Ibiro Ntaramakuru by’Abongereza (Reuters) byatangaje ko itsinda ry’Abakirisitu ndetse n’indi miryango itegamiye kuri Leta mu gihugu no hanze yacyo yagenzuye igasanga hamaze kubura abantu 150 muri ibi byaro bya Assyria, harimo abagore n’abasaza, bose bakaba batazi irengero ryabo.

Perezida w’Ishaka ritavuga rumwe na leta ya Siriya rikorera muri Istanbul (Syriac National Council of Syria), Bassam Ishak, yagize ati “ Twagenzuye dusanga abagera ku 150 bashimuswe nk’uko bivugwa n’abari aho byabereye.”

Na none kandi irindi tsinda ry’Abanyasiriya riharanira uburenganzira bw Muntu rikorera mu bwongereza, ryari ryatangaje ko abagera kuri 90 bashimuswe, ubwo abarwanyi ba Leta ya Kiyisilamu bagabaga ibitero mu gace kitwa Hasaka gatuwe n’abakirisitu cyane.

Ku wa mbere ni bwo agatsiko k’abarwanyi bo mu mutwe wa Leta ya Kiyisilamu bibasiye imijyi ya Tal Chamiran na Tal Hermoz yo mu ntara ya Hasaka bashimuta abasaga 90, ku wa kabiri umubare uriyongera.